ქართული ოცნების საზოგადოებასთან ურთიერთობის მდივანი, შალვა პაპუაშვილი პარტიის მხარდამჭერებს ნაციონალური მოძრაობის მხრიდან შესაძლო პროვოკაციებზე აფრთხილებს. ის ამბობს, რომ მოთმენა რთულია, მაგრამ, მათ ამის ვალდებულება აქვთ.

"ჩვენ კიდევ ერთხელ მოვუწოდებთ ჩვენს მხარდამჭერებს — არჩევნებამდე დარჩა 10 დღე. ნაციონალური მოძრაობა ამ 10 დღის განმავლობაში გავა ყველა ადამიანური და მორალური საზღვრების მიღმა. მოთმენა არის რთული, მაგრამ, ეს არის ჩვენი ვალდებულება ჩვენი ხალხის და ქვეყნის წინაშე. 2 ოქტომბერს ეს ყველაფერი ჩვენი და ჩვენი ქვეყნის გამარჯვებით დასრულდება", — განაცხადა შალვა პაპუაშვილმა.

ასე გამოეხმაურა დეპუტატი გუშინ, დმანისში, მმართველი პარტიისა და ოპოზიციის მხარდამჭერებს შორის დაპირისპირებას. პაპუაშვილი ამბობს, რომ ენმ არეულობის გამოწვევას ცდილობს, თუმცა აღნიშნავს იმასაც, რომ ყველა დამნაშავე კანონის შესაბამისად დაისჯება.

დაპირისპირება დმანისში გუშინ, 21 სექტემბერს წინასაარჩევნო შეხვედრის დროს მოხდა. ქართული ოცნების მხარდამჭერები ოპოზიციის წარმომადგენლებს ჯერ სიტყვიერად, შემდეგ კი ფიზიკურად დაუპირისპირდნენ, დაჭრილია 2 ადამიანი.

ენმ-მ მომხდარზე პასუხისმგებლობა ქართულ ოცნებას დააკისრა. თუმცა ქართული ოცნების თავმჯდომარე, ირაკლი კობახიძემ განაცხადა: "კაცმა დაჭრა, დეგენერატმა ვიღაც კაცი, რა პასუხისმგებლობა უნდა ავიღო".

დღე ცნობილი გახდა, რომ ნაციონალური მოძრაობის მხარდამჭერის დაჭრის ბრალდებით ქართული ოცნების კანდიდატის შვილი, დავით დაუთაშვილი დააკავეს. შსს-ს განცხადებით, დაკავებულმა 21 სექტემბერს დანით სახის არეში დაზიანებები მიაყენა ენმ-ს მხარდამჭერებს.