შინაგან საქმეთა სამინისტროს განცხადებით, ანჯაფარიძის ქუჩაზე მომხდარი განზრახ მკვლელობის ფაქტი გახსნეს. უწყების ცნობით, გამოძიებით დადგინდა, რომ 21 წლის ა.ჭ. და 22 წლის გ.კ., ნიკა კვარაცხელიას მკვლელობის განზრახვით, წინასწარ შემუშავებული გეგმის მიხედვით მოქმედებდნენ.

"კერძოდ, მიმდინარე წლის 15 სექტემბერს, აღნიშნული პირები ნაქირავები ავტომანქანით თბილისში, ვერიკო ანჯაფარიძის ქუჩაზე მივიდნენ და ნიკა კვარაცხელიას ჩაუსაფრდნენ. საქმეზე მოპოვებული მტკიცებულებებით, ასევე, დადგინდა, რომ ა.ჭ.-მ ნიკა კვარაცხელიას მიმართ ცეცხლსასროლი იარაღიდან 10-ზე მეტი ტყვია ესროლა და შემთხვევის ადგილიდან გ.კ.-სთან ერთად, ნაქირავები ავტომანქანით მიიმალა", — აცხადებს უწყება.

მათივე ინფორმაციით, გამოძიება საქართველოს სისხლის სამართლის კოდექსის 108-ე მუხლით და 236-ე მუხლის მე-3 და მე-4 ნაწილებით მიმდინარეობს. ა.ჭ.-ს და გ.კ.-ს ადგილსამყოფელის დადგენის და მათი დაკავების მიზნით ტარდება კომპლექსური ოპერატიულ-სამძებრო და საგამოძიებო მოქმედებები.

ნიკა კვარაცხელია, რომელიც 15 სექტემბერს ანჯაფარიძის ქუჩაზე დაჭრეს, კლინიკაში გარდაიცვალა.

ნიკა კვარაცხელია Forbes-ის 30 წლამდელთა სიაში იყო. ის, ასევე, საქართველოში ონლაინ-პლატფორმა Feedc შემქმნელია.