ქართული ოცნება ნაციონალურ მოძრაობას ხელვაჩაურის შტაბში შეჭრაში ადანაშაულებს. მმართველი პარტიის საზოგადოებასთან ურთიერთობის მდივნის შალვა პაპუაშვილის განცხადებით, ოპოზიციის აქტივისტებმა ენმ-ის მერობის კანდიდატის დახეული პლაკატი მიიტანეს, რომელიც, პაპუაშვილის თქმით, უდიდესი ალბათობით თავად დააზიანეს.

"გაუგონარია უშუალოდ ის საბაბი, რომელიც ჩვენს ოფისში შესაჭრელად პროვოკატორებმა გამოიყენეს. მათ მიიტანეს კანდიდატის დახეული პლაკატი, რომელიც უდიდესი ალბათობით თავად დააზიანეს და შემდეგ ყოველგვარი ფაქტობრივი მტკიცებულებების გარეშე გამოიყენეს მიზეზად, რომ ეს მძიმე პროვოკაცია მოეწყოთ, რაც მათ საბოლოო ჯამში ვერ შეძლეს.

საუბარია არა მხოლოდ ტელევიზიების წარმომადგენლებზე, არამედ მერობისა და მაჟორიტატორობის კანდიდატებზე და მათ აქტივზე. ეს არის გაუგონარი თავხედობა, რომელიც მიმართულია იმისკენ, რომ უკონტროლო პროცესები გამოიწვიოს", — განაცხადა შალვა პაპუაშვილმა ქართულ ოცნებაში გამართულ ბრიფინგზე.

თავად ნაციონალური მოძრაობა კი მმართველ გუნდს პლაკატის დაზიანებაში ადანაშაულებს. ენმ-ს განცხადებით, სწორედ ამიტომ მოაწყვეს აქცია-პერფორმანსი ქართული ოცნების შტაბთან და მიშა ბოლქვაძის დაზიანებული ბანერი მიიტანეს. ოპოზიციაში აცხადებენ, რომ პირველი შემთხვევა არ არის, როცა ოპონენტების ბანერს აზიანებენ.