პოლიტიკურმა პარტიამ გირჩი ცესკოს გადაწყვეტილება, სარეფერენდუმო კითხვის არ დაარეგისტრირების შესახებ, დღეს თბილისის საქალაქო სასამართლოში გაასაჩივრა.

პარტიის ლიდერის, ზურაბ ჯაფარიძის ინფორმაციით, სასამართლო ცენტრალურ საარჩევნო კომისიას დაეთანხმა და გირჩის საჩივარი არ დააკმაყოფილა.

შეკითხვა გულისხმობდა კანაფის ან კანაფის პროდუქტების ლეგალიზებას ან დარეგულირებას ქართულ ბაზარზე.

"ცესკოს არგუმენტი ის იყო, რომ კითხვა არის ბუნდოვანი და გაუგებარი იქნება მოსახლეობისთვის რას უნდა დაუჭირონ ან არ დაუჭირონ მხარიო. ცესკოს ერთ-ერთმა წარმომადგენელმა ისიც დაამატა - კაცებისთვის შეიძლება გასაგები იყოს, მაგრამ ქალებისთვის იქნება გაუგებარიო" - წერს ზურაბ ჯაფარიძე ფეისბუკზე.

გირჩი დავის გაგრძელებას აპირებს.

"უნდა ისჯებოდეს თუ არა საქართველოში ნარკოტიკების მოხმარება?" - ასეთი იყო გირჩის რეფერენდუმის კითხვა თავდაპირველად, რომელიც მოგვიანებით შეიცვალა და დაზუსტდა შემდეგი ფორმულირებით - "თანახმა ხართ თუ არა, რომ მოხდეს კანაფის და კანაფის პროდუქტების ლეგალიზაცია, ანუ ისევე რეგულირდებოდეს, როგორც თამბაქო და სპირტიანი სასმელები?".