მთავარი არხის ოპერატორ ლევან აბლოთიას თბილისში გადმოყვანის შემდეგ დამატებითი კვლევები უტარდება. ექიმის თქმით, მას მრავლობითი დაზიანება აღენიშნება.

"26 წლის პაციენტი შემოყვანისას არის კონტაქტური, ადეკვატური, აღენიშნება ექსკორეაქციები, ტკივილი. მენჯ-ბარძაყის კვლევით, მარცხენა ბარძაყი ძვლის ციბრუტის ხაზოვანი ხაზოვან მოტეხილობაზე არის საეჭვო რენტგენოლოგიური სურათი, რის გამოც პაციენტი გაყვანილია დამატებით კვლევებზე. ეს არის მენჯ-ბარძაყის სახსრის კომპიუტერული კვლევა, ასევე ჩატარდება გულმკერდის კომპიუტერული კვლევა. დამატებით ცნობებს, ჩატარებული კვლევების შემდეგ მოგახსენებთ", — აღნიშნა ექიმმა.

მთავარი არხის ინფორმაციით, ქარელში, ქართული ოცნების წევრებმა მათი ოპერატორი პარტიის შტაბის მეორე სართულიდან გადმოაგდეს. როგორც ჟურნალისტი ბექა ყორშია ყვება, მმართველი პარტიის შტაბის წევრები მისვლისთანავე აგრესიულად შეხვდნენ. მისი თქმით, იყო ფიზიკური დაპირისპირებაც.

ინციდენტის შემდეგ, ქართული ოცნების ოფისში სპეციალური ბრიფინგი გაიმართა, სადაც პარტიის აღმასრულებელმა მდივანმა, მამუკა მდინარაძემ განაცხადა, რომ მთავარი არხის ოპერატორი პარტიის ქარელის შტაბის მეორე სართულიდან შემთხვევით გადმოვარდა. ის ადასტურებს, რომ შტაბის წევრებსა და ტელევიზიის გადამღებ ჯგუფს შორის სიტყვიერი დაპირისპირება იყო, თუმცა გამორიცხავს ფიზიკურ შეხებას.

საქმეზე გამოძება სისხლის სამართლის კოდექსის 124-ე მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.

გაიგე მეტი: