მთავარ არხის დირექტორი, ნიკა გვარამია აცხადებს, რომ ქარელში, ქართული ოცნების შტაბში დაშავებული ოპერატორის მდგომარეობა ძალიან მძიმე არ არის. თუმცა, ის აღნიშნავს იმასაც, რომ ქარელის საავადმყოფოში არ არის შესაფერისი ტექნიკა იმისთვის, რომ სრულად გამოიკვლიონ ოპერატორის მდგომარეობა.

"ძალიან მძიმე მდგომარეობა საბედნიეროდ არ არის. როგორც ექიმები მეუბნებიან, აქ არ არის სამწუხაროდ მაღალი ხარისხის ტექნიკა, რომელიც ამას გადაიღებს, მაგრამ რა ხარისხიც აქ არის, ამის შედეგად დადგინდა, რომ არის მენჯ-ბარძაყის მოტეხილობა და ნეკნებთან და ხელთან დაკავშირებით ამ ტექნიკით ჯერჯერობით არაფერი არ ჩანს [საშიში] და ძალიან ბედნიერი ვარ ამის გამო. არის თუ არა ტვინის შერყევა და მუცლის ღრუში რამე, ესეც უნდა გადამოწმდეს უფრო ზუსტი ტექნოლოგიებით, იმიტომ, რომ აქ ამის შესაძლებლობა უბრალოდ არ არის", — აცხადებს გვარამია.

აღსანიშნავია, რომ ხმაური იყო ქარელის საავადმყოფოსთან, სადაც ახლა დაშავებული ოპერატორი იმყოფება. მთავარი არხის მიერ გავრცელებულ კადრებში ჩანს, რომ ადგილზე მისულ ქართული ოცნების შტაბის წევრებსა და მთავარი არხის თანაშრომლებს შორის სიტყვიერი დაპირისპირება შემდეგ ერთ-ერთმა მოქალაქემ ჟურნალისტს ხელი ჰკრა. ქართული ოცნების მხარდამჭერები ამტკიცებენ, რომ მთავარი არხის ოპერატორი აივნიდან არ გადმოუგდიათ და ის შემთხვევით გადმოვარდა. ისინი ამბობდნენ, რომ საავადმყოფოსთან სწორედ ამის სათქმელად მივიდნენ.

მთავარი არხის ინფორმაციით, ქარელში, ქართული ოცნების წევრებმა მათი ოპერატორი პარტიის შტაბის მეორე სართულიდან გადმოაგდეს. როგორც ჟურნალისტი ბექა ყორშია ყვება, მმართველი პარტიის შტაბის წევრები მისვლისთანავე აგრესიულად შეხვდნენ. მისი თქმით, იყო ფიზიკური დაპირისპირებაც.

ინციდენტის შემდეგ, ქართული ოცნების ოფისში სპეციალური ბრიფინგი გაიმართა, სადაც პარტიის აღმასრულებელმა მდივანმა, მამუკა მდინარაძემ განაცხადა, რომ მთავარი არხის ოპერატორი პარტიის ქარელის შტაბის მეორე სართულიდან შემთხვევით გადმოვარდა. ის ადასტურებს, რომ შტაბის წევრებსა და ტელევიზიის გადამღებ ჯგუფს შორის სიტყვიერი დაპირისპირება იყო, თუმცა გამორიცხავს ფიზიკურ შეხებას.

საქმეზე გამოძება სისხლის სამართლის კოდექსის 124-ე მუხლით დაიწყო, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.