ადიგენის გამგეობის ინსპექტირების სამსახურის ოთხ თანამშრომელს სამსახურეობრივი გულგრილობა ედებათ ბრალად. ოთხივე მათგანი დანაშაულს აღიარებს. ამის შესახებ სამხრეთის კარიბჭე წერს.

სამხრეთის კარიბჭის ინფორმაციით, ბრალდებულებიდან სამი ინფრასტრუქტურის სამსახურის მთავარი სპეციალისტია, ერთი კი, სახელმწიფო შესყიდვების საკითხებში წამყვანი სპეციალისტია. ოთხივე მათგანს ბრალი სისხლის სამართლის კოდექსის 342–ე მუხლით ედება. ამ მუხლით, სამსახურებრივი გულგრილობა, ესე იგი მოხელის ან მასთან გათანაბრებული პირის მიერ თავისი სამსახურებრივი მოვალეობის შეუსრულებლობა ან არაჯეროვნად შესრულება მისდამი დაუდევარი დამოკიდებულების გამო, რამაც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესების არსებითი დარღვევა გამოიწვია ისჯება ჯარიმით ან თავისუფლების აღკვეთით ვადით სამ წლამდე. იგივე ქმედება, რამაც გამოიწვია ადამიანის სიცოცხლის მოსპობა ან სხვა მძიმე შედეგი ისჯება თავისუფლების აღკვეთით ვადით ორიდან ხუთ წლამდე.

სამხრეთი კარიბჭის ინფორმაციით, დაკავებულებს 2016 წლის 15 მარტს გამოცხადებულ ტენდერთან დაკავშირებით ედავებიან. სატენდერო პირობებით, გამგეობას 22 ათასი მეტრი სიგრძის პოლიეთილენის პ 100 ხარისხის მილები უნდა შეეძინა, თუმცა, გამარჯვებულმა კომპანიამ პ 63 ხარისხის მქონე მილები მიჰყიდა. ერთ მეტრ მილში გადახდილი 40 თეთრის ნაცვლად კი, ცხრა თეთრით მეტი მიუთითა.