ეკონომიკის სამინისტროს ინფორმაციით, თბილისის საერთაშორისო აეროპორტში 12 000 კვ. მეტრის ფართობზე მოფრენის ახალი ტერმინალი შენდება, რომელსაც ახალი ჩასხდომის ხიდი ორი გასასვლელით, თვითმფრინავის 5 ახალი სადგომი, F კოდის თვითმფრინავებისთვის გათვლილი, 105 მეტრის სიგრძის ბარგის ე.წ. კარუსელი და 250 მანქანაზე გათვლილი ახალი ავტოსადგომი ექნება.

სამუშაოების დასრულების შემდეგ თბილისის საერთაშორისო აეროპორტს ჯამში ექნება ჩასხდომის 5 ხიდი და 6 Bus Gate. თბილისის საერთაშორისო აეროპორტის ორივე ტერმინალი წელიწადში 3 500 000 -ზე მეტ მგზავრს მოემსახურება.

მოფრენის ახალ ტერმინალს კომპანია ტავ ჯორჯია აშენებს, რისთვისაც 33 მლნ. აშშ დოლარის ინვესტიცია ხორციელდება. სამშენებლო სამუშაოები 2016 წლის 27 ივნისს დაიწყო.

ტერმინალის მშენებლობაზე ამჟამად 500 ადამიანია დასაქმებული. მოფრენის ახალი ტერმინალის დასრულება 2017 წლის სექტემბერში იგეგმება, თუმცა, როგორც ტავ ჯორჯიაში აცხადებენ, შესაძლოა მშენებლობა უფრო ადრე - 2017 წლის ივნისში დასრულდეს.