თბილისის მერობის კანდიდატი და დედაქალაქის მოქმედი მერი კახა ოპონენტებთან დებატებთან დაკავშირებით ამბობს, რომ თექვსმეტივეს ედებატება, რადგან ცალ-ცალკე "საინტერესონი არ არიან". ამავდროულად ის დასძენს, რომ ყველა მათგანს პატივს სცემს.

"ყველა კანდიდატი ერთად დაჯდეს და მზად ვარ ვიდებატო, არანაირ პრობლემას არ წარმოადგენს. თექვსმეტივე ერთად დაჯდეს, ცალ-ცალკე ნამდვილად არ არიან საინტერესონი. ყველას პატივს ვცემ, ჩემთვის რომელიმეს გამოყოფა არ იქნება სწორი. არაფრით არ განსხვავდება გიორგი გახარია ანა დოლიძისგან, რიჩარდისგან ან ნებისმიერი სხვა კანდიდატისგან, ისევე, როგორც ნიკა მელია ან თუნდაც სხვა. მზად ვარ, ყველას დავუჯდე დებატებში", — თქვა კალაძემ რუსთავი 2-თან.

2 სექტემბერს გიორგი გახარიამ თბილისის მერობის კანდიდატები, კახა კალაძე და ნიკა მელია დებატებში გამოიწვია.

10 სექტემბერს ფორმულამ, მთავარმა არხმა, TV პირველმა და კავკასიამ ერთობლივი განცხადება გაავრცელეს და თბილისის მერობის სამი კანდიდატი, რომლებიც ბოლო კვლევების თანახმად მნიშვნელოვანი უპირატესობით ლიდერობენ: კახა კალაძე, ნიკა მელია და გიორგი გახარია დებატებში საჯაროდ გამოიწვიეს.

სამივე კანდიდატის თანხმობის შემთხვევაში, დებატები ოთხივე არხის ერთიან ეთერში, 28 სექტემბერს, სამშაბათს, 22:00 საათზე გაიმართება.