შინაგან საქმეთა სამინისტროს ცნობით, დიდი ოდენობით ქონების მიღების მიზნით გამოძალვის, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ბრალდებით, თბილისში, დავით გურამიშვილის გამზირზე ერთი პირი დააკავეს.

უწყება აცხადებს, რომ გამოძიების ვერსიით, ბრალდებული 1969 წელს დაბადებულ დ. ბ.-ს, მისი და მისი ოჯახის წევრების სიცოცხლის მოსპობის მუქარით, 200 ათასი აშშ დოლარს სძალავდა.

შსს-ს ცნობით, სამართალდამცველებმა იგი მანამდე დააკავეს, ვიდრე დაზარალებული მას მოთხოვნილ თანხას გადასცემდა.

პოლიციამ, დაკავებულის საცხოვრებელი ბინის ჩხრეკისას, GOLD STAR-2002-ის და WOLTRA PROFESSIONAL Mod. 92-ის მოდელების 2 არარეგირტრირებული პისტოლეტი, 50 საბრძოლო ვაზნა და მობილური ტელეფონები, რომლებითაც იგი მუქარას ახორციელებდა, ნივთმტკიცებად ამოიღო.

შსს-ს განცხადებით, ბრალდებული ჩადენილ დანაშაულს აღიარებს.

გამოძიება დიდი ოდენობით ქონების მიღების მიზნით გამოძალვის, ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის ფაქტებზე მიმდინარეობს.