ცენტრალური საარჩევნო კომისიის მტკიცებით, საარჩევნო ადმინისტრაციაზე ზოგიერთი პოლიტიკური ძალის მხრიდან უპრეცედენტო ზეწოლა მიმდინარეობს, რითაც ისინი საარჩევნო კომისიების საქმიანობის ხელისშეშლასა და საარჩევნო პროცესის დაზიანებას ცდილობენ. ამის შესახებ უწყების პრესსპიკერმა დღეს, 9 სექტემბერს გამართულ ბრიფინგზე განაცხადა. მისი თქმით, "უსაფუძვლო ბრალდებები და ზეწოლა" განსაკუთრებით საოლქო საარჩევნო კომისიების მიმართ მიმდინარეობს. იოსელიანი ამის მაგალითად ასახელებს ლანჩხუთის ინციდენტს, სადაც, მისი თქმით, ენმ-ს წევრი ჟურნალისტების თანხლებით შეიჭრა, კომისიის თავმჯდომარეზე ზეწოლას ახდენდა და ემუქრებოდა მას.

"საოლქო საარჩევნო კომისიამ საუბნო საარჩევნო კომისიების წევრები კანონმდებლობის სრული დაცვით აირჩია და ბრალდება, რომ საოლქო საარჩევნო კომისია "ნიშნავს" პოლიტიკურად მიკერძოებულ პირებს, არის სიცრუე, რომელსაც აქვს ერთადერთი მიზანი — მოქალაქეები შეიყვანოს შეცდომაში.

საოლქო საარჩევნო კომისიების წარმომადგენლებს მოვუწოდებთ, გააგრძელონ კანონით განსაზღვრული საქმიანობის ნეიტრალურად განხორციელება. არ აყვნენ პროვოკაციებს. ზეწოლის ან მუქარის შემთხვევაში იმოქმედონ კანონის შესაბამისად. სრულ მხარდაჭერას ვუცხადებთ საოლქო საარჩევნო კომისიებს მათ საქმიანობაში და მზადების პროცესში 2 ოქტომბრის არჩევნებისთვის. და ამასთან ვაცხადებთ, რომ ყოველთვის გვექნება შესაბამისი რეაგირება ნებისმიერი სახის კანონსაწინააღმდეგო ქმედებაზე", — განაცხადა ნათია იოსელიანმა.

ის არჩევნებში ჩართულ ყველა მხარეს მოუწოდებს, თუ აქვთ რომელიმე საარჩევნო მოხელის მიკერძოებული საქმიანობის დამადასტურებელი დოკუმენტი, წარადგინონ კანონით განსაზღვრული წესით და "ნუ გაავრცელებენ მედია საშუალებებით არასწორ ინფორმაციას". იოსელიანის თქმით, ამან მოქალაქეები შეიძლება შეცდომაში შეიყვანოს და ასევე, "გამოიწვიოს მათში უნდობლობის განცდა", როცა საარჩევნო ადმინისტრაციის მთელი შემადგენლობა ემსახურება იმას, რომ ამომრჩეველმა "თავისუფლად მიიღოს კენჭისყრაში მონაწილეობა".

გარდა ამისა, ცესკოს ინფორმაციული დაცულობის ცენტრის სპიკერის, თორნიკე გოგისვანიძის განცხადებით, ინტერნეტ სივრცეში გამოჩნდა ვებგვერდი Cesko.cf, რომელიც საზოგადოების შეცდომაში შესაყვანად ცესკოს ლოგოსა მისთვის დამახასიათებელ სხვა დეტალებს იყენებს. მისი თქმით, ამ საკითხზე უკვე მიმართეს Facebook-ს და გვერდის წაშლა მოითხოვეს.

ცესკოს წარმომადგენელი კიდევ რამდენიმე გვერდზე საუბრობს და აცხადებს, რომ სავარაუდოდ, მათი შექმნის მიზანი საზოგადოების შეცდომაში შეყვანაა. გოგისვანიძე მათ შორის ასახელებს მოძრაობა სირცხვილიას მიერ დაფუძნებულ სამოქალაქო საარჩევნო კომისიას, Cec.org.ge-ს.

"არჩევნებს ატარებს და საზოგადოებას ამ არჩევნების უტყუარ შედეგებს აწვდის მხოლოდ საარჩევნო ადმინისტრაცია, ხოლო ზემოაღნიშნულის მსგავსი აქტივობები არის ამომრჩევლის შეცდომაში შეყვანის და დეზორიენტაციის მცდელობა. შესაბამისად, ყველა ზემოაღნიშნული აქტივობა შეიძლება განვიხილოთ როგორც საარჩევნო პროცესის მიზანმიმართული დაზიანება", — განაცხადა თორნიკე გოგისვანიძემ.