გარემოსდაცვითი ზედამხედველობის დეპარტამენტის სამეგრელო-ზემო სვანეთის სამმართველოს გარემოსდაცვითი ინსპექტირების განყოფილების თანამშრომლებმა სამედიცინო სახიფათო ნარჩენების არადანიშნულების კონტეინერში განთავსებისა და სამედიცინო დაწესებულებების მიერ მტკნარი წყლის ლიცენზიის გარეშე მოპოვების ფაქტები გამოავლინეს.

დეპარტამენტის ინფორმაციით, სამედიცინო კორპორაცია ევექსის ზუგდიდის რეფერალური საავადმყოფოს დათვალიერებისას აღმოჩნდა, რომ საავადმყოფოში სახიფათო სამედიცინო ნარჩენები სპეციალურ კონტეინერებში არ ინახებოდა.

მსგავსი ფაქტი გამოვლინდა ასევე შპს ზუგდიდის ინფექციური საავადმყოფოს დათვალიერებისას - სახიფათო სამედიცინო ნარჩენები არც ამ საავადმყოფოში ინახებოდა სპეციალურ კონტეინერებში. გარდა ამისა, აღმოჩნდა, რომ აღნიშნული საავადმყოფოს მიერ ლიცენზიის გარეშე ხდებოდა მტკნარი წყლის მოპოვება.

მტკნარი წყალს ლიცენზიის გარეშე მოიპოვებდა კიდევ ერთი სამედიცინო დაწესებულება - შპს ზუგდიდის ტუბსაწინააღმდეგო საავადმყოფო.

აღნიშნულ ფაქტებთან დაკავშირებით, გარემოსდაცვითი ზედამხედველობის დეპარტამენტის თანამშრომლებმა შესაბამისი ოქმები შეადგინეს. მასალები, შემდგომი განხილვისთვის, სასამართლოს გადაეგზავნა.