ჯანდაცვის მინისტრმა, ეკატერინე ტიკარაძემ ჩამოთვალა რამდენი ადამიანი ესწრება საკოორდინაციო საბჭოს მისი უწყებიდან. მინისტრმა ეს დაავადებათა კონტროლისა და საზოგადოებრივი ჯანმრთელობის ცენტრის დირექტორის, ამირან გამყრელიძის განცხადებაზე საუბრისას გააკეთა, რომელმაც თქვა, რომ საბჭოზე ექიმები უმცირესობაში არიან.

"ჯანდაცვის სამინისტრო თავის მხრივ საბჭოზე წარმოდგენილი არის როგორც მინისტრის, მინისტრის მოადგილის, დაავადებათა კონტროლის ცენტრის მხრიდან ორი წარმომადგენლის, ასევე საბჭოს ესწრება შრომითი უსაფრთხოების ინსპექციის სიპის ხელმძღვანელი და ასევე გადაუდებელი დახმარების სიპის ხელმძღვანელი. ეს შემადგენლობა, რა თქმა უნდა, არ არის მცირე, მაშინ როდესაც საბჭოს მხოლოდ თითო წარმომადგენელი ესწრება სხვადასხვა სამინისტროებიდან და უწყებებიდან", — განაცხადა ეკატერინე ტიკარაძემ რუსთავი 2-ის ეთერში.

ის ფიქრობს, რომ გამყრელიძის ნათქვამი არაერთგვაროვნად იყო აღქმული.

"არაერთგვაროვნად იქნა აღქმული ბატონი ამირანის განმარტება და აქედან გამომდინარე, მე, ალბათ, თავს შევიკავებ ნებისმიერი კომენტარისგან. მან თქვა ის, რაც ჩათვალა საჭიროდ, თუმცა როგორ იქნა ეს აღქმული მოსახლეობისგან და ასევე მედიასაშუალებებისგან და როგორი ინტერპრეტაცია მოყვა ამას, კიდევ დამატებითი კომუნიკაცია ესაჭიროება ალბათ", — ამბობს ტიკარაძე.

ამირან გამყრელიძემ არჩევნების გადადებასთან დაკავშირებული კითხვის საპასუხოდ განაცხადა, რომ საკოორდინაციო საბჭოზე ექიმები უმცირესობაში არიან, ამიტომ, გადაწყვეტილებას ამ საკითხზე პოლიტიკოსები მიიღებენ. გამყრელიძემ აღნიშნა ისიც, რომ არჩევნები, ზოგადად, ამძიმებს ეპიდვითარებას.

გაიგე მეტი: