დაავადებათა კონტროლის ცენტრის დირექტორის, ამირან გამყრელიძის განცხადებით, სახალხო დამცველს შეუძლია საკოორდინაციო საბჭოზე დასწრება და მსჯელობა.

"რა თქმა უნდა, სახალხო დამცველი, მე კარგად მახსოვს, როდესაც ეს ინსტიტუცია შეიქმნა საქართველოში 90-იან წლებში და უაღრესად პატივმცემელი ვარ ამ ინსტიტუციის იმიტომ, რომ ეს არის ქვეყნის დემოკრატიული განვითარების ერთ-ერთი მთავარი ღერძი. პატივს ვცემ ქალბატონ ნინოს, მაგრამ კიდევ ერთხელ ვამბობ, არ უნდა იყოს ეს პოლიტიკურ თემად აწეული. ქალბატონი ნინო შეიძლება მობრძანდეს, მას აქვს უფლება, საკოორდინაციო საბჭოზე და იქ იყოს ამ საკითხებზე დებატები", — განაცხადა მან TV პირველის ეთერში.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.