ყოფილი მსოფლიო ჩემპიონის, ავთანდილ ხურციძის განცხადებით, აშშ-ს საპატიმროს ვადაზე ადრე, 14 სექტემბერს დატოვებს. ამის შესახებ მან სოციალურ ქსელში დაწერა. ხურციძე დანაშაულებრივი ჯგუფის წევრობის დროს თაღლითობისა და რეკეტის ბრალდებითაა დაკავებული.

ის წერს, რომ მზად არის კარიერის გასაგრძელებლად, ამერიკას კი მადლობას უხდის ვადაზე ადრე გათავისუფლებისთვის.

"მოგესალმებით გულშემატკივრებს, მეგობრებს, ნათესავებს. მინდა გაცნობოთ და გახაროთ, რომ 14 სექტემბერს აღირიცხება და აღინიშნება ჩემი თავისუფლების დღე. თავისუფლება ზუსტად ისეთია, როგორიც გახლავართ მე. გამოვდივარ სრული მონდომებით და მომზადებით, რათა მივაღწიო აღნიშნული კარიერის დასასრულს, სულ დარჩენილი რამდენიმე ქამრის ხელში მოგდების შემთხვევაში და ამისთვის მქონდა მთელი ხუთწლიანი სამზადისი, ყველანაირი პირობა, რათა მომეხდინა ძალების შეგროვება ყველაზე ძლიერ ადგილზე, ფედერალურ საკანში. რაღა დაგიმალოთ და უკეთეს პირობებში, რაც კი მქონია სამშობლოში სპორტული მზადების დროს", — წერს ავთანდილ ხურციძე სოციალურ ქსელში.

ყოფილი მსოფლიო ჩემპიონი ნიუ-იორკში 2017 წელს დააკავეს. პროკურატურის განმარტებით, ხურციძე იყო დანაშაულებრივი დაჯგუფების წევრი, რომელსაც რაჟდენ შუალაია ხელმძღვანელობდა. პროკურატურა შულაიას ე.წ. ქურდად მოიხსენიებდა. მათივე თქმით, შუალაიას დაჯგუფების წევრები მონაწილეობდნენ გამოძალვის, ქურდობისა და ძალადობის საქმეებში. 2018 წლის ხურციძე აშშ-ში ნიუ-იორკის სასამართლომ დამნაშავედ ცნო და ათწლიანი პატიმრობა მიუსაჯა.