"საქართველოს ვიზალიბერალიზაციის საკითხის განხილვა გეგმის მიხედვით მიმდინარეობს" - ეს განცხადება საქართველოს საგარეო საქმეთა მინისტრმა, მიხეილ ჯანელიძემ გააკეთა და განმარტა, რომ გუშინ ევროკავშირში პირველი მოსმენა მუდმივი წარმომადგენლების დონეზე გაიმართა, სადაც საქართველოს საკითხზე იმსჯელეს.

მისი თქმით, საბოლოო დასკვნას იუსტიციის და შინაგან საქმეთა სამინისტროების საბჭო გამოაქვეყნებს. სხდომა ივნისის დასაწყისისთვისაა დაგეგმილი:

"ჩვენი მიზანია და სურვილია, რომ მუდმივმა წარმომადგენლებმა ამ განხილვების დროს მოამზადონ საკითხი უკვე პოზიტიური გადაწყვეტილებისთვის".

გუშინ, 24 მაისს, საქართველოს ევროკავშირში უვიზოდ მიმოსვლის საკითხი ევროკავშირის საბჭოს სხდომაზე განიხილეს.

23 მაისს კი ევროკავშირმა საქართველოსთან ასოცირების შეთანხმების რატიფიცირების პროცედურა დაასრულა, რომელიც ძალაში ივლისიდან შევა.