ყოფილი პრემიერმინისტრის, გიორგი გახარიას განცხადებით, არჩევნებს არც ისე დიდი ფული სჭირდება. ასე პასუხობს ის ჟურნალისტის კითხვას დაფინანსებაზე.

"არჩევნებს ფული სჭირდება, მაგრამ არც ისე დიდი ფული, თქვენ რომ წარმოგიდგენიათ. მე მარტივ რაღაცას გეტყვით, იაფი არ ჯდება, მაგრამ ოცნება რასაც ხარჯავს, მინიმუმ ასჯერ ნაკლებს [დავხარჯავთ] და უფრო მეტი და ეფექტური შედეგი გვექნება, აგერ ნახავთ. ეს შეგიძლიათ, დათვალეთ და ჩაიწეროთ", — განაცხადა მან TV პირველის ეთერში.

გიორგი გახარიასა და კახა კალაძეს შორის შეხვედრის შესახებ ინფორმაცია ქართული ოცნების ლიდერებმა გაავრცელეს და ისაუბრეს იმაზე, თითქოს გახარია მზად იყო, ქართული ოცნების მხრიდან ფინანსური დახმარების სანაცვლოდ საკუთარი კანდიდატურა არ დაეყენებინა. თავად გახარიამ ქართული ოცნების ლიდერების ამ განცხადებებს ტყუილი უწოდა და თქვა, რომ მათ სიტყვას ფასი არ აქვს.

პირველ სექტემბერს ცნობილი გახდა, რომ ექსპრემიერი გიორგი გახარია თბილისის მერობისთვის იბრძოლებს. ამან მისი ყოფილი თანაგუნდელების მორიგი კრიტიკა გამოიწვია. მამუკა მდინარაძის განცხადებით, "მელიასთვის გადადგა და ახლა მელიას მეორე ტურში გასათრევად იწყებს ბრძოლას", ხოლო ირაკლი კობახიძე ამბობს, რომ "არჩევნები არ არის ოლიმპიადა, რომ ბრინჯაოს მედლისთვის იბრძოლო და "მესამე ადგილისთვის არ იბრძვიან არჩევნებში".