პრემიერმინისტრი, ირაკლი ღარიბაშვილი ქართული ოცნების დამფუძნებელს, ბიძინა ივანიშვილს Game Changer-ს უწოდებს და ამტკიცებს, რომ მან არამხოლოდ პოლიტიკური, არამედ მთელი ქვეყნის ცხოვრება სრულიად შეცვალა.

"მე ერთ-ერთ გამოსვლაში ვთქვი, რომ ამ კაცმა [ბიძინა ივანიშვილმა] მართლაც შეცვალა ჩვენი პოლიტიკური ცხოვრება კი არა, ზოგადად, მთელი ქვეყნის ცხოვრება. Game changer რომ იტყვიან, სწორედ ასეთი ადამიანი არის და მართლაც უნდა აღინიშნოს, რომ ის რეფორმები, ის საქმეები, რომელიც დავიწყეთ 1-ლი ოქტომბრიდან და დღემდე გრძელდება ეს საქმეები, არის უპრეცედენტო. უპრეცედენტო თავისი მასშტაბით, თავისი შინაარსით, თავისი განზომილებით, მნიშვნელობით ჩვენი ქვეყნის, ჩვენი ხალხისთვის", — განაცხადა ღარიბაშვილმა.

ირაკლი ღარიბაშვილს თავის გამოსვლებში არაერთხელ გადაუხდია მადლობა ბიძინა ივანიშვილისთვის, მათ შორის, დღეს. პრემიერმინისტრმა საჩხერის მერობის კანდიდატის წარდგენაზე თქვა, რომ "ასეთ ადამიანს მადლობა კი არ ეკუთვნის, ეკუთვნის ყოველდღე მადლობა". ამასთან, ღარიბაშვილმა გააკრიტიკა ოპოზიცია, რომელიც მისი მტკიცებით, მათ "დაკომპლექსებას" ცდილობს, რომ "თურმე არ შეიძლება მადლობის გადახდა ასეთი ადამიანისთვის".