პარლამენტის ევროპასთან ინტეგრაციის კომიტეტის თავმჯდომარის, მაკა ბოჭორიშვილის თქმით, მმართველი გუნდი მზადაა ჰქონდეს კომუნიკაცია ვიოლა ფონ კრამონთან, თუ ის ამას მოისურვებს და უკეთესი აღქმის შესაძლებლობა ექნება, თუ რას ფიქრობს საქართველოს ხელისუფლება.

"ძალიან სამწუხაროა, თუ ვიოლა ფონ კრამონი ვერ ამჩნევს ამას. მზად ვართ, მზად ვიყავით ყოველთვის და ვიქნებით, რომ მასთან გვქონდეს კომუნიკაცია, თუ ის, რა თქმა უნდა, ამას მოისურვებს და უკეთესი აღქმის შესაძლებლობები ექნება, თუ რას ფიქრობს საქართველოს ხელისუფლება და როგორ ვფიქრობთ ევროკავშირის გზაზე საჭირო რეფორმების გატარებას. ამ მიმართულებით სანერვიულო საქართველოს მხარდამჭერებს ნამდვილად არ აქვთ. საქართველო ყოველთვის ამტკიცებდა და ამტკიცებს, რომ სტრატეგიული პარტნიორების გვერდით დგას, როდესაც ეს საჭიროა, ჩვენ ეს ვნახეთ ავღანეთთან მიმართებაში, ეს გზა გაგრძელდება და გრძელდება", — განაცხადა ბოჭორიშვილმა.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

ამასთანავე, საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".