ცოტა ხნის წინ ნეტფლიქსმა You-ს მე-3 სეზონი სისხლისგამყინავი თიზერით დააანონსა, რომელშიც სერიალის მთავარი გმირი — ჯო გოლდბერგი თავის შვილზე გვიყვება, პარალელურად კი პატარასთვის ტორტს ამზადებს. ახალი სეზონის პრემიერა 15 ოქტომბერსაა დაგეგმილი.

ამის შემდეგ მე-3 სეზონის პირველი ფოტოებიც ვიხილეთ, რომელმაც ჩვენი მოლოდინი გაამართლა: როგორც ჩანს, ჯო ახალი მსხვერპლის ასარჩევად ან სხვა სახის მზაკვრული გეგმების შესასრულებლად ბავშვით ხელში ემზადება.

ფოტო: Netflix

You-ს მესამე სეზონი კალიფორნიაში ჯოსა და ლავის ახალი ოჯახური ცხოვრებით იწყება. მათ შვილი — ჰენრი ჰყავთ, თუმცა წყვილის ურთიერთობა დაძაბულია. ჯომ მე-2 სეზონის ბოლოს თვალი ახალ მეზობელს დაადგა, რაც, დიდი ალბათობით, მასზე არანაკლებ დაკვირვებულ და საშიშ ლავს ნამდვილად არ გამოეპარება.

ფოტო: Netflix

ფოტოებში ჯოს ცნობილ მინის ყუთსაც ვხედავთ, რომელსაც იგი მსხვერპლის დასატყვევებლად იყენებს. როგორ გამოიყენებენ ამ საშიშ ნივთს ლავი და ჯო მე-3 სეზონში, ჯერჯერობით ცნობილი არაა.

ფოტო: Netflix

მესამე სეზონში ისევ ვიხილავთ პენ ბეჯლისა და ვიქტორია პედრეტის. რა თქმა უნდა, სერიალს ახალი სახეები და პერსონაჟებიც შემოუერთდებიან, რომელთაც ჯოსა და ლავის ინტრიგებში გზის გაკვლევა და გადარჩენა მოუწევთ.

ფოტო: Netflix

ქეროლაინ კეპნესის წიგნის მიხედვით გადაღებული სერიალი მაყურებელმა პირველად 2018 წელს იხილა. პირველი სერიიდან ჯო ჩვენს გაოცებასა და შეშინებას ყოველთვის ახერხებდა. ვინ იქნება ამჯერად ჯოს მსხვერპლი და როგორ განვითარდება მისი არც ისე ჰარმონიული ოჯახური ცხოვრება, ამას სულ მალე გავიგებთ.

ფოტო: Netflix

ფოტო: Netflix