პრემიერმინისტრის, ირაკლი ღარიბაშვილის განცხადებით, ამოცანა უნდა იყოს, რომ სექტემბრის ბოლომდე 2 მილიონი ადამიანი აიცრას.

"ჩვენ არცერთი მოქალაქე არ უნდა დაგვრჩეს ზრუნვის გარეშე, ჩვენ ყველას მაქსიმალური ზრუნვა უნდა აღმოვუჩინოთ. ამას გარდა, რაც მთავარია, უნდა გავიმეორო კიდევ ერთხელ, რომ ჩვენთვის მთავარი გამოსავალი ამ სიტუაციაში არის სწორედ აცრები და ვაქცინაციისკენ ყველას უნდა მოვუწოდოთ. ჩენ მილიონ ადამიანს ძალიან მალე ავცრით, ალბათ, უახლოეს რამდენიმე დღეში. ჩვენი ამოცანა უნდა იყოს, რომ სექტემბრის ბოლომდე 2 მილიონი ჩვენი მოქალაქე იყოს აცრილი. აქედან ზოგი იქნება ერთჯერადად, ზოგი იქნება უკვე ორჯერადად აცრილი, ალბათ, მილიონს უკვე გადატანილი ექნება და აქვს კიდევაც უკვე გადატანილი", — აცხადებს პრემიერმინისტრი.

მისივე თქმით, მეცნიერების პროგნოზით, ოქტომბრიდან შედარებით დამშვიდდება სიტუაცია.

"საბოლოო ჯამში, ჩვენ ვფიქრობთ, რომ ჩვენი ექიმები და მეცნიერები ამბობენ, რომ მათი პროგნოზია — შედარებით დასტაბილურდება სიტუაცია. ეს რამდენიმე კვირა დაგვრჩა, რომ გადავიტანოთ ყველამ ერთად, ეს მძიმე პერიოდი და ოქტომბრიდან ყველა პროგნოზის მიხედვით დამშვიდდება სიტუაცია, თუმცა რა თქმა უნდა, მანამდე უნდა მივიდეთ მობილიზებულად და ეს სიტუაცია უნდა იმართოს", — ამბობს ღარიბაშვილი.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები