უკრაინის საგარეო საქმეთა მინისტრმა, დმიტრი კულებამ ესტონეთის პრეზიდენტის განცხადებას, რომ უკრაინა, მოლდოვა და საქართველო ევროკავშირში ინტეგრაციისთვის მზად არ არიან, "შეუსაბამო" უწოდა და აღნიშნა, რომ იმედგაცრუებული არიან. მისი თქმით, ეს პოზიცია აცნობეს ესტონეთის საგარეო საქმეთა სამინისტროს და ესტონეთის ელჩს უკრაინაში, რადგან ასეთი შეფასებები პარტნიორი ქვეყნებისგან არ უნდა ისმოდეს.

"20 წელზე ოდნავ მეტი ხნის წინ დასავლეთის ქვეყნები ასეთივე მენტორული ტონით ეუბნებოდნენ ესტონელებს, ლატვიელებს და ლიეტუველებს რომ კიდევ 20-30 წელი უნდა გაიზარდონ ნატოსა და ევროკავშირისთვის. ამიტომ, რა თქმა უნდა, ჩემთვის ძალიან უცნაური იყო ესტონეთის პრეზიდენტის ეს სიტყვები, მით უფრო, რომ მე მას ველაპარაკე ყირიმის პლატფორმის სამიტზე და ის ოპტიმისტურად იყო განწყობილი. მე არ ვიცი ზუსტად რა მოხდა ინტერვიუს დროს, რამ იქონია გავლენა მასზე, მაგრამ ეს განცხადებები არ შეესაბამება ჩვენი ურთიერთობების მეგობრულ ხასიათს" — განაცხადა მან.

25 აგვისტოს უკრაინულმა გამოცემამ გამოაქვეყნა ინტერვიუ ესტონეთის პრეზიდენტ კერსტი კალიულაიდთან, რომელმაც სხვა საკითხებთან ერთად, ევროკავშირის გაფართოებაზეც ისაუბრა. მისი თქმით, უკრაინა, მოლდოვა და საქართველო წევრობისთვის ჯერ მზად არ არიან.

"ევროკავშირისგან ვისურვებდი მეტ სითამამეს გაფართოებისთვის. საჭიროა გარკვეული გადაწყვეტილებების მიღება აღმოსავლეთ პარტნიორობის ქვეყნებთან დაკავშირებით — ან იგივე წევრობის შეთავაზება, როგორიც აქვთ ევროკავშირის სხვა წევრებს, ან თანამშრომლობის ახალი ფორმატის შექმნა სახელმწიფოების სამეულთან, რომლებსაც აქვთ ევროპული ამბიციები — უკრაინა, მოლდოვა, საქართველო. პირადად მე პირველ ვარიანტს ვემხრობი, ანუ უბრალოდ გაფართოებას. მაგრამ ისიც უნდა გვესმოდეს, რომ ეს ძალიან დიდ დროს წაიღებს. ევროკავშირის წევრობისთვის საჭიროა უამრავი პირობის შესრულება და გულწრფელად რომ ვთქვათ, ამ სამიდან არცერთი სახელმწიფო არ არის მზად წევრობის კრიტერიუმების შესასრულებლად. თქვენ დაგჭირდებათ, ალბათ, 20 წელი, სანამ ამ მზადყოფნას მიაღწევთ.

ამიტომ, შესაძლოა, აზრი ჰქონდეს რამე შუალედური ვარიანტის პოვნას, რომელიც უკრაინას, მოლდოვასა და საქართველოს დაეხმარება ითანამშრომლოს ევროკავშირთან, რაც არის თქვენი სურვილი. ბოლოს და ბოლოს, თქვენი ეკონომიკები ახლა ამის გარეშეც ინტეგრირდება ევროკავშირზე ეკონომიკაში.

თუმცა ამ სამი ქვეყნიდან არცერთი წევრობისთვის მზად არ არის. სამივეს აქვს პრობლემები მართლმსაჯულების სისტემასთან დაკავშირებით. ჩვენ მზად ვართ, დაგეხმაროთ შეცვლაში, მაგრამ საქმე უნდა გააკეთოთ თქვენ, ამ სამი ქვეყნიდან თითოეულმა. და ეს რთული საქმეა".

კალიულადის შეფასება გააკრიტიკა თბილისის მერმა და პარტნიორი ქვეყნის პრეზიდენტს მოუწოდა, თავის ქვეყანას მიხედოს. ჟურნალისტების კითხვას, აფუჭებს თუ არა ასეთი განცხადებები ესტონეთთან ურთიერთობებს, ასე უპასუხა:

"ჰკითხეთ ესტონეთის პრეზიდენტს, აფუჭებს თუ არა. აუცილებლად დაუსვით ეს შეკითხვა ესტონეთის პრეზიდენტს", — განაცხადა თბილისის მერმა.

მან კალიულაიდის განცხადებებს "არასწორი" უწოდა. კალაძის თქმით, ევროკავშირის წევრობისთვის ყველაფერი კეთდება და "უამრავი წინსვლა გვაქვს".