შუა ქალაქში, ცხელი ძაღლი, ცისფერი მთები, ჩემი ცოლის დაქალები, შერეკილები — ეს იმ ქართული ფილმებისა და სერიალების მცირე ჩამონათვალია, რომელსაც ქართველი მაყურებლის სიყვარული და ყურადღება არასდროს მოჰკლებია. ამჯერად ჩვენმა საყვარელმა პერსონაჟებმა ტელეეკრანებიდან ხაზოვან ხელოვნებაში გადაინაცვლეს: გიგი მინდიაშვილმა გადაწყვიტა, მაყურებლის საყვარელი პერსონაჟები და ისტორიები მინიმალისტური ვიდეოებით გაეცოცხლებინა.

გიგი მინდიაშვილი ილიას სახელმწიფო უნივერსიტეტში ფიზიკის ფაკულტეტზე სწავლობს. ხელოვნება მისი ჰობია და თავისუფალ დროს სხვადასხვა პროგრამებში საინტერესო ვიდეოებისა და ფოტოების შექმნას უთმობს. ამასთან, ქართული ფილმები და სერიალებიც აინტერესებს. სწორედ ამიტომ გადაწყვიტა, ორი გატაცება გაეერთიანებინა და საყვარელი ფილმებისა და სერიალების მიხედვით მინიმალისტური ვიდეოები შეექმნა.

"ჩემთვის ორმაგად სასიამოვნოა ის ფაქტი, როდესაც რაიმე ახალი და ქართული იქმნება. ვფიქრობ, ქართველებს ხელოვნების კუთხით ამოუწურავი მასალა გვაქვს, რომელსაც ადამიანზე საკმაოდ დიდი შთაბეჭდილების მოხდენა შეუძლია. მეც ამ შთაბეჭდილების ქვეშ ვარ, რასაც ჩემი ვიდეოების საშუალებით გადმოვცემ", — ამბობს გიგი.

გიგი ვიდეოებში იმ კადრებსა და მომენტებს აცოცხლებს, რომლებმაც მასზე განსაკუთრებული შთაბეჭდილება მოახდინეს:

"ყველა სერიალსა თუ ფილმს აქვს თავისი დამახასიათებელი დეტალი: მსახიობი, რომელმაც თავისი უბადლო შესრულებით დიდი შთაბეჭდილება დატოვა შენზე, მუსიკა და სხვა. ეს ყველაფერი ჩემს გონებაში დიდხანს რჩება. ამ დეტალების არჩევა და შემდგომ ვიდეოს გაკეთება სასიამოვნო და მარტივი პროცესია", — ამბობს გიგი.

ეკრანზე ნანახი პერსონაჟები, მუსიკა და დასამახსოვრებელი მომენტები საბოლოოდ ხაზოვანი ხელოვნების სახეს იღებენ და ამბავს მოკლე, მინიმალისტური ვიდეოებით გვიყვებიან.