პარტია საქართველოსთვის ერთ-ერთი ლიდერი, ნათია მეზვრიშვილი აცხადებს, რომ მმართველმა პარტიამ ადამიანების სიცოცხლე და ჯანმრთელობა წინასაარჩევნოდ პოპულიზმს გადააყოლა. მისი თქმით, დღევანდელ ხელისუფლებას კოვიდის მართვის უნარი და კომპეტენცია არ გააჩნია.

"სამწუხაროდ, ის, რასაც დღეს ჩვენ კოვიდის კუთხით ვხედავთ, ეს გახლავთ ქართული ოცნების დღევანდელი ხელმძღვანელობის უპასუხისმგებლო გადაწყვეტილებების, არათანმიმდევრული და ყოველგვარ ლოგიკას მოკლებული გადაწყვეტილებების შედეგი. ჩვენ, პრაქტიკულად, ვნახეთ, რომ მმართველმა გუნდმა წინასაარჩევნოდ პოპულიზმს გადააყოლა ადამიანების სიცოცხლე და ჯანმრთელობა", — განაცხადა ნათია მეზვრიშვილმა.

მეზვრიშვილმა აღნიშნა ისიც, რომ არცერთ ეტაპზე ხელისუფლებას არ უწარმოებია ვაქცინაციის სწორი და ეფექტიანი კამპანია და არ გაუთვალისწინებია პროფესიონალების რეკომენდაციები.

"სიკვდილიანობის მაჩვენებლის კლება ქვეყანაში არ შეინიშნება და ეს ტენდენცია, მინდა, გითხრათ, რომ კიდევ ერთი ნათელი დადასტურებაა იმისა, რომ ქართული ოცნების დღევანდელ ხელმძღვანელობას ქვეყნის მართვის და კრიზისებთან გამკლავების არც უნარი გააჩნია და არც კომპეტენცია", — განაცხადა მან.

25 აგვისტოს მონაცემებით, ჯამში საქართველოში კორონავირუსის 528 043 დადასტურებული შემთხვევა დაფიქსირდა, გამოჯანმრთელება — 463 306, გარდაიცვალა — 6 949.

New York Times-ის მიხედვით, ბოლო შვიდი დღის განმავლობაში ყოველ 100 000 მოსახლეზე დაინფიცირების მაჩვენებლით საქართველო პირველ ადგილზეა.