ქართული ოცნების თავმჯდომარის, ირაკლი კობახიძის განცხადებით, არჩევნების გადადებაზე კამპანია წელს, ისევე როგორც წინა წელს, სახალხო დამცველმა დაიწყო და სირცხვილიამ გააგრძელა. მისი თქმით, ეს არის "საარჩევნო მარცხის წინასწარი აღიარება".

"არჩევნების გადადების ერთადერთი სამართლებრივი მექანიზმი არსებობს, ეს არის საგანგებო მდგომარეობის გამოცხადება, როდესაც სახალხო დამცველი საუბრობს საგანგებო მდგომარეობს გამოცხადებაზე, ეს თავისთავად არის უკვე ანომალია. ხედავთ, რომ გაშლილია ნაცმოძრაობის ერთიანი კამპანია არჩევნების გადადებასთან დაკავშირებით, რაც არის საარჩევნო მარცხის წინასწარი აღიარება.

ჩვენ ასეთივე კამპანია გვახსოვს წინა წლიდან, 2020 წელსაც, მაშინაც ნინო ლომჯარიამ დაიწყო ეს კამპანია, შემდეგ სირცხვილიამ გააგრძელა. ამ შემთხვევაშიც, დაიწყო კიდევ ერთხელ ნინო ლომჯარიამ და გააგრძელა სირცხვილიადან მიშა მშვილდაძემ", — განაცხადა კობახიძემ ტელეკომპანია იმედთან.

დღეს, საკოორდინაციო საბჭოს წევრებმა განაცხადეს, რომ არჩევნების გადადების საკითხზე ჯერ არ უმსჯელიათ, თუმცა ეს არც გამორიცხეს.

"მომავალში რა მსჯელობა იქნება, მაგის შესახებ ნამდვილად ვერ მოგახსენებთ, აღნიშნულ ეტაპზე მსგავსი საკითხი არ განუხილავს", — განაცხადა საბჭოსთან არსებული ოპერაციული შტაბის უფროსმა, გიორგი ღიბრაძემ.

სახალხო დამცველი, ნინო ლომჯარია აცხადებს, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

გაიგე მეტი: