განზრახ მკვლელობის ბრალდებით დაკავებულ ოლიმპიური ჩემპიონს, ზურაბ ზვიადაურს თავდებში 30 ადამიანი უდგება. ამის შესახებ მისმა ადვოკატმა, ტარიელ მურმანიშვილმა განაცხადა. ადვოკატი მათ ვინაობას ჯერ არ ასაჯაროებს, თუმცა ამბობს, რომ ისინი "საზოგადოებაში პატივცემული ადამიანები" არიან. ინფორმაცია იმის შესახებ, რომ ზვიადაურის თავდებში პოლიტიკოსებიც უდგებიან, მისმა ადვოკატმა არც უარყო და არც დაადასტურა.

ტარიელ მუმრანიშვილის ინფორმაციით, ზვიადაურს ჯანმრთელობის პრობლემები აქვს და "წელი და ხერხემალი აწუხებს". ადვოკატი აპირებს მიმართოს პენიტენციურ სამსახურს ზვიადაურის კლინიკაში გადაყვანის თხოვნით.

სააპელაციო სასამართლოს სხდომა, სადაც ზვიადაურისთვის აღკვეთის ღონისძიების შეცვლის საკითხი განიხილება, სავარაუდოდ, მომდევნო დღეებში ჩაინიშნება.

ზურაბ ზვიადაურს აღკვეთის ღონისძიების სახით პატიმრობა თელავის რაიონულმა სასამართლომ 18 აგვისტოს შეუფარდა. დაცვის მხარე მათ გათავისუფლებას გირაოსა და პირადი თავდებობის სანაცვლოდ ითხოვდა. კერძოდ, ადვოკატები 50 000 ლარიან გირაოს შეფარდებას ითხოვდნენ, ასევე, თავდებში უდგებოდნენ ოლიმპიური ჩემპიონები — ლაშა ტალახაძე და ლაშა ბექაური, ასევე ევროპისა და მსოფლიოს ჩემპიონი, ავთანდილ ჭრიკიშვილი და ქართული ოცნების ყოფილი დეპუტატი, ზაქარია ქუცნაშვილი.

ზურაბ ზვიადაური პოლიციამ განზრახ მკვლელობის ბრალდებით 17 აგვისტოს დააკავა. შსს-ს ინფორმაციით, ზვიადაურმა სასიკვდილოდ დაჭრა პირი, რომელმაც მისი ძმა, ზვიად ზვიადაური მოკლა. ის თავს დამნაშავედ არ ცნობს.

გაიგე მეტი: