46 სენატორი ბაიდენის ადმინისტრაციას მოუწოდებს, გააძლიეროს ძალისხმევა რისკის ქვეშ მყოფი ავღანელების, განსაკუთრებით კი აქტივისტი ქალი ლიდერების, ჟურნალისტების და სხვა სპეციფიური ჯგუფების ქვეყნიდან გამოსაყვანად, რისთვისაც სპეციალური სავიზო პოლიტიკის შემუშავებას სთავაზობენ. ამასთან დაკავშირებით სენატორთა ჯგუფის წერილი სახელმწიფო დეპარტამენტს და თავდაცვის დეპარტამენტს 16 აგვისტოს გაეგზავნა. თუმცა, ამ წერილზე ოფიციალური პასუხი ჯერჯერობით არ გავრცელებულა.

"მოგიწოდებთ, შექმნათ ჰუმანიტარული ვიზის კატეგორია სპეციალურად ლიდერი ქალებისთვის, აქტივისტებისთვის, უფლებადამცველებისთვის, მოსამართლეებისთვის, დეპუტატებისათვის, ჟურნალისტებისათვის და ავღანეთის სპეცრაზმის ქალთა ტაქტიკური ოცეულის წევრთათვის", — ნათქვამია წერილში.

ასევე აღნიშნულია, რომ მთავარი პრიორიტერი ავღანეთიდან აშშ-ის მოქალაქეებისა და დიპლომატების ევაკუაციაა. თუმცა, ანალოგიურ ვალდებულებად მიაჩნიათ იმ ადამიანების დახმარება, ვინც წლების განმავლობაში ამერიკელებთან თანამშრომლობდა, განსაკუთრებით კი იმ ქალებზე, რომლებიც ამჟამად თალიბანის მთავარი სამიზნეეები არიან. საუბარია მასწავლებლებზე, მოსამართლეებზე, ჟურნალისტებზე და სხვა სფეროებში დასაქმებულ ქალებზე.

მათი რეკომენდაციაა, რომ აშშ-ის იმიგრაციის სამსახურში დაინიშნოს სპეციალური წარმომადგენელი, რომელიც კონკრეტულად ამ მიმართულებით იმუშავებს და საჭირო პროცედურებს გაუწევს კოორდინაციას.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

გაიგეთ მეტი: