პრემიერმინისტრის, ირაკლი ღარიბაშვილის განცხადებით, ე.წ. ასოცირების სამეულს, ანუ საქართველოს, უკრაინასა და მოლდოვას ერთად შეუძლია ბევრი წარმატებული მაგალითის ჩვენება საერთაშორისო საზოგადოებისთვის. ეს განცხადება ღარიბაშვილმა კიევში, უკრაინის პრემიერმინისტრთან, დენის შმიგალთან ერთობლივ ბრიფინგზე გააკეთა.

"ჩვენ, სამ ქვეყანას — მოლდოვას, უკრაინას, საქართველოს შეგვიძლია, რომ მართლაც ბევრი წარმატების მაგალითი ვაჩვენოთ ჩვენს საერთაშორისო თანამეგობრობას და სწორედ ამ ტრიოს ფორმატში დავუმტკიცოთ ჩვენს პარტნიორებს, რომ ჩვენ შეგვიძლია ვიყოთ წარმატებული სახელმწიფოები და მართლაც ვიმსახურებთ ევროკავშირის და NATO-ს წევრობას", — განაცხადა ირაკლი ღარიბაშვილმა.

მისი თქმით, გარკვეულ საკითხებზე ასოცირების სამეულის ქვეყნებმა ერთად უნდა იმუშაონ ევროკავშირთან პრაქტიკული ურთიერთობების გასამყარებლად.

"ევროკავშირთან ჩვენ ინტენსიური უნდა გავხადოთ პრაქტიკული თანამშრომლობის მექანიზმები, საკითხები, რომელიც უკავშირდება ენერგეტიკას, ტრანსპორტს, ციფრულ ბაზარს, დაკავშირებადობას. ვფიქრობ, ეს ის საკითხებია, რომელიც ჩვენ უნდა წამოვჭრათ და ერთობლივად ვიმუშაოთ", — განაცხადა ირაკლი ღარიბაშვილმა.

ევროინტეგრაციის საერთო გზის შესახებ საქართველოს, უკრაინისა და მოლდოვის ერთობლივი მემორანდუმის მნიშვნელობაზე ისაუბრა უკრაინის პრემიერმინისტრმაც. დენის შმიგალმა საქართველოს მადლობა გადაუხადა უკრაინის ტერიტორიული მთლიანობის ურყევი მხარდაჭერისთვის.

საქართველოს დელეგაცია ირაკლი ღარიბაშვილის მეთაურობით უკრაინაში გუშინ, 21 აგვისტოს ჩავიდა. 23 აგვისტოს ღარიბაშვილი მონაწილეობას მიიღებს ყირიმის პლატფორმის სამიტში, რომელსაც 40-ზე მეტი სახელმწიფოს ლიდერები დაესწრებიან.

გაიგე მეტი: