პრემიერმინისტრი ირაკლი ღარიბაშვილი უკრაინაში უკვე ჩაფრინდა და ოფიციალურ შეხვედრებს მართავს. ხვალ, 23 აგვისტოს იგი მონაწილეობას მიიღებს ყირიმის პლატფორმის სამიტში, რომელსაც 40-ზე მეტი სახელმწიფოს ლიდერები დაესწრებიან.

ბორისპოლის საერთაშორისო აეროპორტში ღარიბაშვილს უკრაინის ვიცეპრემიერი, ალექსეი რეზნიკოვი და საგარეო საქმეთა მინისტრის მოადგილე, ვასილ ბოდნარი დახვდნენ.

პირველი ოფიციალური შეხვედრა ღარიბაშვილს ქალაქო ლვოვში ჰქონდა, სადაც უკრაინის პრემიერმინისტრმა, დენის შმიგალმა უმასპინძლა. მთავრობის ადმინისტრაციის ინფორმაციით, ღარიბაშვილი და შმიგალი ლვოვის ხალხური არქიტექტურის მუზეუმს ესტუმრნენ და ადგილობრივი მწარმოებლების პროდუქციის გამოფენაც დაათვალიერეს. ასევე, ლვოვის კულტურული ტურის ფარგლებში დაათვალიერეს ქალაქის ისტორიული და არქიტექტურული ღირსშესანიშნაობები.

ირაკლი ღარიბაშვილი და დენის შმიგალი ლვოვში

ფოტო: საქართველოს მთავრობა

ლვოვის შემდეგ ღარიბაშვილი ოფიციალურ შეხვედრებს კიევში გააგრძელებს. დაგეგმილია შეხვედრა უკრაინის პრეზიდენტთან, ვოლოდიმირ ზელენსკისთან. ასევე, გაიმართება მოლაპარაკებები პირისპირ და გაფართოებულ ფორმატში უკრაინის პრემიერ-მინისტრ დენის შმიგალთან და უკრაინის უმაღლესი რადას თავმჯდომარე დმიტრო რაზუმკოვთან.

ირაკლი ღარიბაშვილთან ერთად, საქართველოს დელეგაციაში არიან ვიცეპრემიერი, საგარეო საქმეთა მინისტრი დავით ზალკალიანი, თავდაცვის მინისტრი ჯუანშერ ბურჭულაძე და მთავრობის ადმინისტრაციის უფროსი ილია დარჩიაშვილი.