კოალიცია მედიის ადვოკატირებისთვის პარტნიორი ორგანიზაციების შეფასებით, ირაკლი აბსანძის გათავისუფლება ტოვებს აღქმას, რომ ამ გადაწყვეტილების რეალური საფუძველი ჟურნალისტის მიერ ბოლო პერიოდში ხელისუფლებისა და ტელევიზიის ხელმძღვანელობის მიმართ გაკეთებული კრიტიკული განცხადებები შეიძლება იყოს. მათი თქმით, აბსანძის გათავისუფლება გაუარესებულ მედიაგარემოს და წინასაარჩევნო პერიოდს ემთხვევა, რაც კიდევ უფრო აღრმავებს ეჭვებს საზოგადოებრივი მაუწყებლის სარედაქციო დამოუკიდებლობის მიმართ.

კვირის ინტერვიუს წამყვანის გათავისუფლების ოფიციალურ მიზეზი ხელშეკრულებით ან/და შრომის შინაგანაწესით დაკისრებული ვალდებულების უხეში/არაერთგზის დარღვევაა. ორგანიზაციების შეფასებით, ბრძანების სამართლებრივი საფუძვლები, უნდობლობას იწვევს და შთაბეჭდილებას ტოვებს, რომ ჟურნალისტის გათავისუფლება მის კრიტიკულ მოსაზრებებს უკავშირდება.

გარდა ამისა, ორგანიზაციაში აღნიშნავენ, რომ აბსანძე კრიტიკულად აფასებდა 5 და 6 ივლისს მედიაზე მასშტაბურ ძალადობას და ხელისუფლების არაეფექტურ რეაგირებას. ის მამრთველი პარტიის ოფისთან აქციაშიც მონაწილეობდა, რა დროსაც პოლიციამ დააკავა და ხელი მოსტეხა. ასევე, აბსანძე აკრიტიკებდა თავად ტელევიზიის ხელმძღვანელობას და მაუწყებლის ეთერით გასულ სადავო ჟურნალისტურ გამოძიებას დავით გარეჯთან დაკავშირებით. ის ფიქრობდა, რომ ამ გადაცემამ ხელი შეუწყო ივერი მელაშვილის წინააღმდეგ სიძულვილის კამპანიის გაძლიერებას. ამის გამო ძალადობრივი ჯგუფების წარმომადგენლებმა მის წინააღმდეგ აქცია დააანონსეს, ხელმოწერების შეგროვება დაიწყეს, და დირექტორს წამყვანის გათავისუფლება მოსთხოვეს.

ამასთან, განცხადებაში აღნიშნულია, რომ მიუხედავად იმისა, რომ ირაკლი აბსანძე არაერთგზის იყო საჯარო სივრცეში ძალადობრივი ჯგუფების შეურაცხმყოფელი თავდასხმის სამიზნე, საზოგადოებრივი მაუწყებლის მენეჯმენტს არ გადაუდგამს ეფექტური ნაბიჯები მის დასაცავად.

ირაკლი აბსანძე საზოგადოებრივ მაუწყებელთან სამართლებრივ დავას გეგმავს.