ინფექციური საავადმყოფოს დირექტორის, თენგის ცერცვაძის განცხადებით, კოვიდრეგულაციების დარღვევის გამო დაწესებული ჯარიმების გაუქმება "ზედმეტად ჰუმანური აქტია".

"ნუ შემოვიღებთ მკაცრ შეზღუდვებს, მაგრამ მივაღწიოთ არსებული რეგულაციების მკაცრ კონტროლს აღსრულებაზე და მათ ზედმიწევნით შესრულებას. მაგალითად ძალიან ჰუმანური ჟესტი იყო გაკეთებული მოსახლეობის მიმართ, როდესაც ჩამოეწერათ ჯარიმები, რომლებიც მათ ქონდათ გამოწერილი, ვთქვათ ნიღბის არ ტარების გამო, მათ შორის, იურიდიულ პირებსაც. მიმაჩნია, რომ ეს, როგორ გითხრათ, იყო ზედმეტად ჰუმანური, ზედმეტად ლიბერალური", — თქვა ცერცვაძემ რუსთავი 2-ის ეთერში.

თენგიზ ცერცვაძის შეფასებით, შესაძლებელია, არ დავუბრუნდეთ იმ შეზღუდვებს, რომლებიც ეკონომიკას პირდაპირ დაარტყამს.

"არ დავუბრუნდეთ იმ შეზღუდვებს, რომლებიც დაარტყამს ძირითადად ბიზნესს და ეკონომიკაა. მაგრამ უფრო თამამად აღვასრულოთ ის შეზღუდვები, რომლებიც არ დაარტყამს ეკონომიკას ნაკლებად ურტყამს და ძირითადად პიროვნების კომფორტ-დისკომფორტზეა გათვლილი. მაგალითად ნიღბების ტარება, არანაირად არ უშლის ხელს ეკონომიკის განვითარებას, ის მხოლოდ მეტ კომფორტს ან დისკომფორტს განაპირობებს", — აღნიშნა თენგიზ ცერცვაძემ.

24 ივლისს პრემიერმინისტრმა ირაკლი ღარიბაშვილმა თქვა, რომ კოვიდრეგულაციების დარღვევის გამო დაწესებული გადაუხდელი ჯარიმები უქმდებოდა. საუბარია იყო იზოლაციის, კარანტინის და პირბადის ტარების წესის დარღვევის გამო დაკისრებულ დაახლოებით 76 მლნ ლარის გადაუხდელ ჯარიმებზე.