არგენტინელი ფეხბურთელი, საფეხბურთო კლუბ ბარსელონას თავდამსხმელი, ლიონელ მესი კლუბს ტოვებს.

ბარსელონას ოფიციალურ ფეისბუქ გვერდზე გამოქვეყნებული განცხადების თანახმად, მიუხედავად იმისა, რომ კლუბმა და ფეხბურთელმა შეთანხმებას მიაღწიეს და მზად იყვნენ ახალი ხელშეკრულების გასაფორმებლად, ფინანსური და სტრუქტურული ბარიერების გამო ეს არ მოხერხდება. ამის მიზეზად კლუბი ესპანური ლიგის რეგულაციებს ასახელებს.

შედეგად, კლუბის განცხადებით, მესი საფეხბურთო კლუბ ბარსელონაში აღარ დარჩება.

როგორც განცხადებაში ვკითხულობთ, ორივე მხარე წუხს, რომ მოთამაშისა და კლუბის სურვილი არ დაკმაყოფილდა.

"საფეხბურთო კლუბი ბარსელონა მთელი გულით გამოხატავს მადლიერებას კლუბის გაძლიერებაში მოთამაშის მიერ შეტანილი წვლილის გამო და მას პირად და პროფესიულ ცხოვრებაში საუკეთესოს უსურვებს", — ვკითხულობთ განცხადებაში.

გარდიანის ცნობით, გასულ თვეში მესი დათანხმდა ხუთ-წლიანი ხელშეკრულების დადებას შემცირებული ანაზღაურებით. ამით იმედი ჰქონდათ, რომ ხელშეკრულება კლუბ ბარსელონას ესპანური ლა ლიგის ფინანსურად სამართლიანი თამაშის რეგულაციების საზღვრებში მოაქცევდა, თუმცა ასე არ მოხდა.

კლუბი, რომლის ჯამური დავალიანება 1.173 მილიონი ევროა, ლიგის მიერ დაწესებული ხელფასის ზედა ზღვრითაა შეზღუდული. მესი დათანხმდა ანაზღაურების 50%-იან კლებას, რაც 45 მილიონი ევროდან, გადასახადების გათვალისწინებით, დაახლოებით 20 მილიონ ევრომდე შემცირებას გულისხმობს. კლუბს გარიგების დასასრულებლად ფინანსური რესტრუქტურიზაცია სჭირდებოდა, რაც შეუძლებელი აღმოჩნდა.

საგულისხმოა, რომ სპორტსმენმა 2020 წლის აგვისტოში, კლუბის მაშინდელ პრეზიდენტთან, ხოსე მარია ბართომეოსთან ურთიერთობის გაფუჭების შემდეგ, ბარსელონას დატოვება სცადა, თუმცა იძულებული გახდა, დარჩენილიყო. ახლა კი, როცა მხარეები მზად იყვნენ ხელშეკრულება გაეხანგრძლივებინათ, მას კლუბის დატოვება უწევს.

საინტერესოა, სად გააგრძელებს თამაშს მესი, რომელიც ბარსელონას ყველა დროის ყველაზე წარმატებული ფეხბურთელია. მას 17 სეზონში 672 გოლი აქვს გატანილი.