საქართველოს პარლამენტის წევრის, სალომე სამადაშვილის თქმით, ქართული ოცნება ჩაძირული გემია და ყველა, ვისაც გააზრებული აქვს შარლ მიშელის შეთანხმებასთან დაკავშირებული საერთაშორისო კონიუნქტურა, ცდილობს ამ გემიდან ჩამოვიდეს. ასე ეხმიანება ის პრეზიდენტის კრიტიკულ განცხადებას.

სამადაშვილი ზურაბიშვილის შეფასებას დოკუმენტის ანულირებასთან დაკავშირებით სწორ გადაწყვეტილებად მიიჩნევს და ფიქრობს, რომ ის მმართველი პარტიისგან დისტანცირებას ცდილობს.

"ვფიქრობ, რომ ეს არის ძალიან ბევრისმთქმელი განცხადება, არა იმიტომ, რომ ქართული ოცნება ამის გამო აზრს შეიცვლის, არამედ იმიტომ რომ, ეს აჩვენებს ერთ რამეს ძალიან ცხადად — ქართული ოცნება ეს არის ჩაძირული გემი და ამ გემიდან ჩამოსვლას ცდილობს ყველა, ვისაც შერჩა რაიმე სახის გააზრება საერთაშორისო კონიუნქტურის, რომელიც არსებობს ამ შეთანხმებასთან დაკავშირებით.

სალომე ზურაბიშვილი ცდილობს დისტანცირება მოახდინოს ქართული ოცნებისგან და ეს არის სრულიად სწორი ნაბიჯი", — განაცხადა სალომე სამადაშვილმა.

მას შემდეგ, რაც სალომე ზურაბიშვილი მიშელის შეთანხმების ხელმომწერი პოლიტიკოსების ნაწილს შეხვდა, გუშინ, 3 აგვისტოს სპეციალური ბრიფინგი გამართა და განაცხადა, რომ ვერ აიღებს პასუხისმგებლობას ვერც დოკუმენტის ცალკეულ ელემენტებზე და ვერც მის ანულირებაზე. ზურაბიშვილმა აღნიშნა, რომ არ ეთანხმება ქართული ოცნების არგუმენტებს, რითიც ხსნიან დოკუმენტის ანულირება.

გარდა ამისა, ზურაბიშვილმა სიტყვით გამოსვლისას კიდევ ერთხელ გაუსვა ხაზი შეთანხმების შესრულების აუცილებლობას და მმართველი გუნდის წევრებიგააკრიტიკა. მან განაცხადა, რომ ჩვენ მოვითხოვთ უცხოეთისგან პატივისცემას და გვაღიზიანებს მათი მითითებები და კრიტიკა, თუმცა იმისთვის რომ პატივისცემა დავიმსახჯუროთ, სიტყვას პატივი უნდა ვცეთ და ნაკისრი ვალდებულებები შევასრულოთ.

ამავე თემაზე: