პარტია საქართველოსთვის ლიდერი, გიორგი გახარია გასაჯაროებულ დოკუმენტებთან დაკავშირებით აცხადებს, რომ ეჭვი ეპარება ამის ავთენტურობაში და უნდა ჩატარდეს გამოძიება.

"არ მიყურებია, არ მომისმენია, თუმცა წავიკითხე, მომიყვნენ. რეალურად წარმოდგენა არ მაქვს საერთოდ რაზეა საუბარი. დიდი ეჭვი მეპარება საერთოდ ამის ავთენტურობაში. პირველ რიგში, რაც გასაკეთებელია და რაც სახელმწიფოს ვალდებულებაა, რა თქმა უნდა, უნდა ჩატარდეს შესაბამისი გამოძიება და დადგინდეს საერთოდ ეს რა არის. მანამდე ნებისმიერი სახის კომენტარის გაკეთება არასერიოზულია", — ამბობს გახარია.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

გაიგე მეტი: