მოსალოდნელია, რომ ბაქო-თბილისი-ყარსის რკინიგზის პროექტი ზაფხულის დასაწყისისთვის სრულად დასრულდება. ინფორმაციას თურქული მედია ავრცელებს.

"ჩვენ გვსურს, რომ დავიწყოთ დიზელის ლოკომოტივით. მშენებლობა სრულად დასრულდება 2 თვეში და შემდეგი 2 თვე ტესტირების რეჟიმში იქნება" - განაცხადა თურქეთის ტრანსპორტის მინისტრმა აჰმეტ არსლანმა.

მან დასძინა, რომ რკინიგზის ახალი ხაზი მგზავრობის დროს, ჩინეთიდან ევროპამდე, 45 დღიდან 15 დღემდე შეამცირებს.

ბაქო-თბილისი-ყარსის რკინიგზა ახალი დერეფანი იქნება, რომელიც აზერბაიჯანს, საქართველოსა და თურქეთს სარკინიგზო მაგისტრალით დააკავშირებს. პროექტი ასევე გახსნის ჩრდილო-სამხრეთ დერეფანს რუსეთიდან თურქეთის მიმართულებით.

826 კილომეტრის სიგრძის რკინიგზას შეუძლია მნიშვნელოვნად შეამციროს ტრანზიტის ხანგრძლივობა ევროპასა და ჩინეთს შორის.

ბაქო-თბილისი-ყარსის სარკინიგზო მაგისტრალის მშენებლობას საფუძველი აზერბაიჯანის პრეზიდენტის, ილჰამ ალიევის ინიციატივით ჩაეყარა. პროექტის განხორციელება კი საქართველომ, აზერბაიჯანმა და თურქეთმა 2007 წელს დაიწყეს.