მთავარი არხის დირექტორის, ნიკა გვარამიას მიერ გავრცელებული ჩანაწერებში თავის საუბარი ფორმულას ჟურნალისტმაც, ნინო გელაშვილმაც ამოიცნო.

როგორც ჟურნალისტი აცხადებს, საუბარი 2020 წლის ზაფხულში პრეზიდენტის ადმინისტრაციის წარმომადგენელთან შედგა.

"მე ვადასტურებ, რომ ესეთი საუბარი ნამდვილად შედგა, გასული წლის ზაფხულში დავურეკეთ პრეზიდენტის ადმინისტრაციის წარმომადგენელს ჟურნალისტებმა ინფორმაციის დასაზუსტებლად, ეს იყო ძალიან ჩვეულებრივი სამუშაო პროცესი, ჩვენი საუბარი ეხებოდა რაღაც ინფორმაციის დაზუსტებას და აქ, რა თქმა უნდა, არავითარი დანაშაულის ნიშნები არ ყოფილა და შესაბამისად, გაუგებარია რატომ გახდა ეს საუბარი ვინმესთვის საინტერესო, რატომ დაიხარჯა ამაზე რესურსი და რა თქმა უნდა, თვითონ ის ფაქტი, რომ ასე ხდება მოსმენა ჟურნალისტების, რიგითი საუბრის, არის შემაშფოთებელი ჟურნალისტისთვისაც და როგორც მოქალაქისთვისაც," — ამბობს გელაშვილი ფორმულას ეთერში.

1 აგვისტოს გასაჯაროებულ დოკუმენტში აღნიშნულია, რომ 2020 წლის 17 ივნისს საზოგადოებრივი მაუწყებლისა და ფორმულას ჟურნალისტი პრეზიდენტის ადმინისტრაციის წარმომადგენელს, ნათია პავლიაშვილს ინფორმაციის დასაზუსტებლად.

გაიგე მეტი:

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.