ქართული ოცნების დეპუტატი, გია ვოლსკი მთავარი არხის დირექტორის, ნიკა გვარამიას მიერ, სავარაუდოდ, სუს-ის დოკუმენტების გასაჯაროებას პროვოკაციების მცდელობად აფასებს. ვოლკსის თქმით, ნიკა გვარამიას შეუძლია, ამ ჩანაწერებში ვინც უნდა ის ახსენოს, რადგან "ენას ძვალი არ აქვს". მისივე მტკიცებით, ფარული მოსმენების საჭიროება არ დგას.

"დესტაბილიზაცია რომ გინდა ქვეყანაში შექმნა, მარტო მედიასაშუალებები და დასმული შეკითხვები არ არის საკმარისი. ამისათვის აუცილებელია დაუცველობისა და არასტაბილურობის განცდა შეიქმნას მთელ ქვეყანაში. ასე რომ, რომ მოულოდნელი არ იყო, ასეთი შეთხზული ისტორიით გამოვიდოდა ამ საქმეში გაწაფული და საკმაოდ მაღალ თანამდებობზე ძველ პერიოდში დასაქმებული ადამიანი. მეც, თქვენც იქნებით ნახსენები, მისი თავიც, ვისაც გინდა ახსენებს, პასუხისმგებლობა აქვს რამეზე თუ ენას ძვალი აქვს? პროვაკაციის მსგავსის შექმნის მცდელობაა, რომელსაც სურს რომ ჩამოეკიდოს", — განაცხადა გია ვოლსკიმ.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.