საქართველოს ეროვნული უნივერსიტეტი და სეუ დეველოპმენტი ქართველ ძიუდოისტსა და ოლიმპიურ ჩემპიონს, ლაშა ბექაურს, რომელიც ამავე უნივერსიტეტის სტუდენტიცაა, საჩუქრად ბინას გადასცემენ. ინფორმაცია ამის შესახებ უნივერსიტეტის ოფიციალურ ფეისბუქგვერდზე გამოქვეყნდა.

"სეუ-ს რექტორის, ბატონი გია კავთელიშვილის გადაწყვეტილებით, SEU-ს სტუდენტს და ახლა უკვე ოლიმპიურ ჩემპიონს, ლაშა ბექაურს საჩუქრად გადასცემს სეუ დეველოპმენტის დასრულებულ კომპლექსში საბურთალოზე, პოლიტკოვსკაიას (ჯიქიას) ქუჩაზე, 100 კვადრატული მეტრი [ფართობის] ბინას", — წერია უნივერსიტეტის განცხადებაში.

ფოტო: ძიუდოს ფედერაცია

28 ივლისს 21 წლის ლაშა ბექაური პირველი სპორტსმენი გახდა, რომელმაც საქართველოს ნაკრებს ტოკიოს ოლიმპიურ თამაშებზე ოქროს მედალი მოუპოვა. ბექაური, რომელიც კაცების 90კგ წონით კატეგორიაში გამოდიოდა, ნახევარფინალში რუსი მეტოქის დამარცხების შემდეგ, ფინალში გერმანელ ედუარდ ტრიპელს შეხვდა და ასპარეზობა ტრიუმფით დაასრულა.

"მინდა, დიდი მადლობა გადავუხადო ჩემს ყველა გულშემატკივარს", — განაცხადა ძიუდოისტმა გამარჯვების შემდეგ, — "მსურს, ეს გამარჯვება მთელ საქართველოს მივულოცო. ვიცი, რომ ჩემი სამშობლო და ხალხი ძალიან ბედნიერია. ჩემი სამშობლოსთვის დღეს ბოლომდე ვიბრძოლე და ეს ბრძოლა და შრომა დამიფასდა: გავხდი ოლიმპიური ჩემპიონი და ავიხდინე დიდი ოცნება. ეს ჩვენ ყველამ ერთად გავაკეთეთ: ძიუდოისტების მთელმა გუნდმა, ჩვენმა ექიმებმა და მინდა, ამისთვის ყველას დიდი მადლობა გადავუხადო".

აღსანიშნავია, რომ საქართველოს მთავრობის ივლისში მიღებული გადაწყვეტილებით, ოლიმპიური ჩემპიონი ერთ მილიონ ლარსაც მიიღებს.