ევროპული საქართველოს ლიდერის, გიგა ბოკერიას განცხადებით, ოპოზიციურ პარტიების მხრიდან თვითმმართველობის არჩევნების ბოიკოტის განხილვა ლეგიტიმურია, თუმცა მისთვის უფრო პრიორიტეტულია კოორდინირებული მუშაობა, გაყალბების მექანიზმების გადალახვა და არჩევნებში მმართველი გუნდის დამარცხება. მან ასევე აღნიშნა, რომ მნიშვნელოვანია, ოპოზიციამ დატოვოს პარლამენტი და გაფორმდეს, რომ ლეგიტიმური დემოკრატიული ინსტიტუტები არ არსებობს ქვეყანაში.

"არსებობს ლეგიტიმური საფუძველი რომ სხვადასხვა პოლიტიკურმა ძალებმა განიხილონ თვითმმართველობის არჩევნების ბოიკოტის საკითხი. მე ვიხრები იმისკენ, რომ პირიქით კოორდინაცია და ამ არჩევნებზე იმ ტიპის დარტყმის მიყენება, მიუხედავად არალეგიტიმური მეთოდებისა და გაყალბების მცდელობისა, რომლებსაც ექნება ადგილი, შეიძლება გახდეს სწორედაც რომ დაჩქარების ინსტრუმენტი რეჟიმის შეცვლის", — აღნიშნა ბოკერიამ.

მისივე თქმით, მმართველი გუნდის განცხადებაში იგრძნობოდა, მათი პანიკა. ქართული ოცნების ძალაუფლების შენარჩუნების ფორმულად ის ძალადობასა და დაშინებას მიიჩნევს.

რამდენიმეთვიანი პოლიტიკური კრიზისის შემდეგ ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო.

შესაბამისად, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაში ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის. შარლ მიშელის შეთანხმების ერთ-ერთი მთავარი ჩანაწერი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.

გაიგეთ მეტი: