ქართული ოცნების ერთ-ერთ ლიდერ მამუკა მდინარაძეს კულტურის მინისტრის თეა წულუკიანის მიერ მთავარი არხის ჟურნალისტისთვის მიკროფონის წართმევა მართლსაწინააღმდეგო ქმედებად არ მიაჩნია და საქციელს პოლიტიკური აქტად აფასებს.

პარლამენტის ბიუროს სხდომაზე ნაციონალური მოძრაობის ერთ-ერთმა ლიდერმა, ხატია დეკანოიძემ მას ჰკითხა, გმობს თუ არა ის თეა წულუკიანის საქციელს, რასაზეც უპასუხა.

"არ ვგმობ წულუკიანის საქციელს იმიტომ, რომ ეს იყო ჩემთვის შეიძლება სუბიექტური ვიყო, მაგრამ პოლიტიკური აქტი და თუ თქვენ მიგაჩნიათ რომ ეს იყო სხვისი ნივთის აშკარა დაუფლება მართლსაწინააღმდეგო მისაკუთრების მიზნით, მაშინ ძარცვა ყოფილა. მაგრამ ვერ იქნება ძარცვა იმიტომ, რომ არ შეიძლება თეა წულუკიანის ჰქონოდა ამ ნივთის მართლსაწინააღმდეგოდ მისაკუთრების მიზანი, როგორც თქვენ და თქვენი ტელევიზია ატყუებთ ხალხს", — თქვა მდინარაძემ.

ვიცე-პრემიერი და კულტურის მინისტრი, თეა წულუკიანი მთავარი არხის ჟურნალისტს მიკროფონს ამ დრომდე არ უბრუნებს. მან ემა გოგოხიას მიკროფონი სენაკის თეატრში წაართვა და შეუარცხყოფა მიაყენა.

აღსანიშნავია, რომ მთავარი არხის ჟურნალისტმა პოლიცია იმავე დღეს გამოიძახა. როგორც გოგოხიამ თქვა, საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ.

ფაქტს 22 ივლისს შინაგან საქმეთა მინისტრი გამოეხმაურა. ვახტანგ გომელაურმა რუსთავი 2-ის ეთერში თქვა, რომ ინფორმაცია ახლა მიიღო და აუცილებლად გაერკვევა.

გარდა ამისა, 23 ივლისს მთავარმა არხმა პროკურატურასაც მიმართა. ნიკა გვარამიას თქმით, ეს არის ძალიან სახიფათო და პირდაპირი სიგნალი, რომ მედიაზე ძალადობრივი ზემოქმედების ახალი ტალღა იწყება.

25 ივლისს სვანეთში მყოფმა კულტურის მინისტრმა ემა გოგოხია სვანეთიდან მიმართა და უთხრა, რომ არხის კუთვნილ მიკროფონს სწორედ აქ დაუბრუნებს. წინააღმდეგ შემთხვევაში, კულტურის მინისტრი თქვა, რომ მიკროფონს ჟურნალისტს სამ ოქტომბრამდე ვერ მიიღებს.

გაიგე მეტი: