საქართველოს ჟურნალისტური ეთიკის ქარტია გმობს თბილისის მერობის კანდიდატის, კახა კალაძის განცხადებას, სადაც მან მედიის საქმიანობა ძალადობრივი ჯგუფების ქმედებებს შეადარა

"ჩვენ არაერთხელ გამოვთქვით შეშფოთება პოლიტიკოსების აგრესიული რიტორიკის გამო, რომლითაც საქართველოში იქმნება არასათანადო გარემო მედიაორგანიზაციებისა და ჟურნალისტების თავისუფალი მუშაობისათვის. აღნიშნული უარყოფითად აისახება ჟურნალისტთა უსაფრთხოებაზე. სწორედ მმართველი პარტიის განცხადებებით იქნა წახალისებული 5 ივლისს მედიის 53 წარმომადგენლის მიმართ ძალადობრივი ქმედებები", — ნათქვამია ქარტიის განცხადებაში.

ქარტია მოუწოდებს ხელისუფლებას საკუთარი აგრესიული დამოკიდებულებით არ წაახალისონ მედიის წარმომადგენლებზე თავდასხმა და შეწყვიტონ საუბარი აზრის, სიტყვისა და გამოხატვის თავისუფლების შემზღუდავ ნორმებზე, მხარი დაუჭირონ მედიის თავისუფლებასა და გადავიდნენ საქმიანი ურთიერთობის რეჟიმზე.

20 ივლისს თბილისის მერობის კანდიდატად წარდგენის შემდეგ, კახა კალაძემ ჟურნალისტებს მიმართა და 5 ივლისს მათ მიმართ განხორციელებული ძალადობა გაუთანაბრა ბულინგს, ცილისწამებასა და დამცირებას, რასაც, მისივე მტკიცებით, ტელეეთერებიდან ვისმენთ.