ჯანდაცვის მინისტრის მოადგილის, თამარ გაბუნიას განცხადებით, რეგულაციები რომ სრულდებოდეს, დღეს კორონავირუსის 2 600 შემთხვევა ნამდვილად არ გვექნებოდა. ამის შესახებ მან საკოორდინაციო საბჭოს წევრების ბრიფინგზე ისაუბრა.

"რაც შეეხება რეგულაციების აღსრულებას, ყველა ვხედავთ, რომ ის რეგულაცია, რომელიც ფურცელზე არის განსაზღვრული და კანონმდებლობა მოითხოვს, ის რომ სრულდებოდეს, დღეს 2 600 შემთხვევა ნამდვილად არ გვექნებოდა. პასუხიმგებლობა ამ შემთხვევაში არის გაზიარებული, მონიტორინგი მნიშვნელოვანია და სახელმწიფო ინსტიტუციები მათი შესაძლებლობის ფარგლებში ამას ახორციელებენ, თუმცა დამრღვევის პასუხისმგებლობა არ არის მხოლოდ ის, რომ ჯარიმა გადაიხადოს და ამით მშვიდი სინდისით გააგრძელოს გართობა. ეს ძალიან სერიოზული პრობლემაა და სამოქალაქო პასუხისმგებლობა თუ სამთავრობო სექტორთან არ გაზიარდა, ვიქნებით მუდამ ამ რთულ მდგომარეობაში", — თქვა მან.

მისივე განცხადებით, რთული ვითარებაა რეგიონებშიც, სადაც არც ვაქცინაციის პროგრამა არ არის აქტიური. გაბუნიას განცხადებით, თუ ვაქცინაცია არ გააქტიურდება, ამ სიტუაციიდან გამოსვლა გართულდება.

20 ივლისის მონაცემებით, საქართველოში კორონავირუსის 2 616 ახალი შემთხვევა დადასტურდა, გამოჯანმრთელდა 880, ხოლო გარდაიცვალა — 26 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: