საქსტატმა საგარეო ვაჭრობის განახლებული მონაცემები გამოაქვეყნა, რომლის მიხედვითაც, მიმდინარე წლის იანვარ-ივნისში საქართველოდან უცხოეთში 1,88 მილიარდი დოლარის საქონელი გავყიდეთ, ხოლო სხვა ქვეყნებისგან 4,33 მილიარდი დოლარის პროდუქცია შევიძინეთ. შესაბამისად, 2021 წლის იანვარ-ივნისში საგარეო სავაჭრო ბრუნვა, ანუ ექსპორტისა და იმპორტის ჯამი 6,21 მილიარდი დოლარი იყო.

მიმდინარე წლის პირველ ნახევარში, გასული წლის იმავე პერიოდთან შედარებით, ექსპორტი 25,2%-ით, ხოლო იმპორტი 18,9%-ით გაიზარდა.

ექსპორტისა და იმპორტის ჯამის მიხედვით, მთავარი სავაჭრო პარტნიორი ქვეყანა კვლავ თურქეთი, რუსეთი და ჩინეთია. მიმდინარე წლის 6 თვეში, ამ სამ ქვეყანაზე მთლიანი სავაჭრო ბრუნვის 37,5% მოდის.

ასეთია იმ 10 ქვეყნის ჩამონათვალი, რომელთანაც 2021 წლის იანვარ-ივნისში ყველაზე მეტად ვივაჭრეთ:

  1. თურქეთი — ექსპორტი $165 მილიონი, იმპორტი — $780 მილიონი;
  2. რუსეთი — ექსპორტი $264 მილიონი, იმპორტი — $466 მილიონი;
  3. ჩინეთი — ექსპორტი $290 მილიონი, იმპორტი — $363 მილიონი;
  4. აზერბაიჯანი — ექსპორტი $244 მილიონი, იმპორტი — $249 მილიონი;
  5. აშშ — ექსპორტი $66 მილიონი, იმპორტი — $268 მილიონი;
  6. სომხეთი — ექსპორტი $101 მილიონი, იმპორტი — $231 მილიონი;
  7. უკრაინა — ექსპორტი $138 მილიონი, იმპორტი — $191 მილიონი;
  8. გერმანია — ექსპორტი $25 მილიონი, იმპორტი — $207 მილიონი;
  9. ბულგარეთი — ექსპორტი $124 მილიონი, იმპორტი — $65 მილიონი;
  10. იტალია — ექსპორტი $16 მილიონი, იმპორტი — $117 მილიონი;

გარდა ამ ქვეყნებისა, სხვა სავაჭრო პარტნიორებთან კიდევ 453 მილიონი დოლარის საქონელი გავიდა ექსპორტზე, ხოლო იმპორტის მოცულობა 1,84 მილიარდი დოლარი იყო.

აღსანიშნავია, რომ იანვარ-ივნისში მთავარი საექსპორტო საქონელი სპილენძის მადნები და კონცენტრატები (391 მილიონი დოლარი) იყო, ხოლო იმპორტის ნაწილში მსუბუქი ავტომობილების სასაქონლო ჯგუფი (371 მილიონი დოლარი) ლიდერობდა.