ტელეკომპანია მაესტროს ჟურნალისტები არხზე გია გაჩეჩილაძის დაბრუნებასა და ვაკო ავალიანის წასვლასთან დაკავშირებით განცხადებას ავრცელებენ, ისინი ამბობენ, რომ არხის მფლობელებისა და დამფუძნებლებისგან ელოდებიან პასუხს კითხვებზე.

"ჩვენ ყოველთვის გვქონდა შეკითხვები არხზე გია გაჩეჩილაძის დაბრუნებასთან დაკავშირებით და დირექტორის წასვლამ უფრო მეტი შეკითხვა გაგვიჩინა, თუნდაც რა იგულისხმება პრიორიტეტების ცვლილებაში. ჩვენ, მაესტროს გუნდს, ამაზე ჯერ პასუხი არ გვაქვს. გვითხრეს მხოლოდ ის, რომ გია გაჩეჩილაძეს არხზე მოაქვს საკუთარი პროექტები ე.წ. აუთსორსით და მას ახალი ამბების რედაქციასთან და მის პოლიტიკასთან შეხება არ ექნება. ჟურნალისტები ველოდებით პასუხს კითხვებზე არხის მფლობელებისა და დამფუძნებლებისგან, იქამდე კი ვაგრძელებთ მუშაობას და გიყვებით ამბებს ისე, როგორც აქამდე გიყვებოდით", — აცხადებენ მაესტროს ჟურნალისტები.

ვაკო ავალიანმა მაესტროს აღმასრულებელი დირექტორის თანამდებობა დატოვა. როგორც მან Facebook-ზე დაწერა, არხზე გია გაჩეჩილაძე ბრუნდება, ტელევიზიის ახალი პრიორიტეტები კი მისთვის მიუღებელია.