მმართველი პარტიის წარმომადგენელი, შალვა პაპუაშვილი, TV პირველს, მთავარ არხს, ფორმულას და კავკასიას, მათი ხელმძღვანელების ორგანიზებული პროტესტისა და განცხადებების გამო, კომენტარზე უარს ეუბნება. თუმცა, ამას თავად ბოიკოტს არ უწოდებს და აღნიშნავს, რომ ეს არის გუნდის გადაწყვეტილება. ამის შესახებ მან განცხადება პარლამენტის ლიფტთან გააკეთა, სადაც მედიამ მისი ჩაწერა მოახერხა.

"ბოიკოტზე არ მოვდივარ. კომენტარს არ გაძლევთ მანამ, სანამ ტელევიზიების ხელმძღვანელები და მათ შორის, სახეები დაკავებულები არიან და პოლიტიკაში შემოდიან ადამიანის სიკვდილზე პოლიტიკური დივიდენდების დაწერით", — განაცხადა პაპუაშვილმა და აღნიშნა, რომ ეს გუნდის გადაწყვეტილებაა.

მას შემდეგ რაც 5 ივლისს ნაცემი ოპერატორის გარდაცვალების გამო მედიამ საპროტესტო აქციები დაიწყო და პრემიერმინისტრის გადადგომა, დამნაშავეების დასჯა მოითხოვა, მმართველ გუნდში მედიის დიკსრედიტაცია დაიწყეს. ისინი ამბობენ, რომ ტელევიზიების მეპატრონეთა ნაწილმა გარდაცვლილი კოლეგის სიკვდილზე გადაწყვიტა პოლიტიკური ქულების ჩაწერა. ქართული ოცნების თავმჯდომარე, ირაკლი კობახიძე კი გამოძიების დასრულებამდე და ექსპერტიზის საბოლოო შედეგამდე ამტკიცებს, რომ 5 ივლისის ძალადობას და ლაშქარავას გარდაცვალებას შორის კავშირი არ არსებობს. ამას იმეორებენ "ოცნების" სხვა სახეებიც.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლსს გარდაიცვალა. ამის გამო, მედიამ იმ დღესვე საპროტესტო აქცია გამართა, რადგან სახელმწიფომ მედიის და გამოხატვის უფლების დაცვა ვერ/არ უზრუნველყო და ღარიბაშვილის გადადგომა მოითხოვა, რასაც საზოგადოების დიდი ნაწილიც შეუერთდა. საპასუხოდ ღარიბაშვილმა ჟურნალისტებზე ძალადობა ნაციონალურ მოძრაობას დააბრალა. მედიის პროტესტი გრძელდება.