საქართველოს ვიცე-პრემიერი და ენერგეტიკის მინისტრი კახი კალაძე მიიჩნევს, რომ ტელეკომპანია რუსთავი 2-ს მათი ხელისუფლებაში ყოფნის დროს პრობლემა არ ჰქონია და არც ექნება. კალაძე ფეისბუკ გვერდზე არხთან დაკავშირებით რიტორიკულ კითხვას სვამს: "როდის ჰქონიათ ამ გამოხატვაში მათ პრობლემა, როდესმე ჰქონიათ მუშაობაში ბარიერები?"

"თუ ამ 5 წლის მანძილზე ტელევიზია, კონკრეტული პარტიის პროპაგანდის რუპორი არ შეზღუდულა, მეტიც, ხელისუფლება, თითოეული ჩვენგანი, მეც ვთანამშრომლობდი, ზუსტად ისე, როგორც სხვა არხებთან, რატომ შეიზღუდება მაინც და მაინც ახლა," - ამბობს კალაძე რუსთავი 2-ზე საუბრისას და პარალელს კვლავ ნაციონალური მოძრაობის ხელისუფლებაში ყოფნის დროს არსებულ მედიაგარემოზე ავლებს.

მინისტრისთვის სასირცხვილოა, როცა მედიის თავისუფლების პირობებში მედიის შეზღუდვაზეა საუბარი. მისი თქმით, სასამართლო დავა იმ პირმა [ქიბარ ხალვაში] მოიგო, რომელსაც მიხელ სააკაშვილმა ხელისუფლებაში ყოფნის დროს რუსთავი 2 აყიდინა.

"სიტყვის თავისუფლებას საფრთხე ემუქრება?! რისგან, ვისგან? ერთმა, ნაციონალების დროს მფლობელმა, მეორე, ნაციონალების დროს მფლობელს რომ ტელევიზია სასამართლოს ძალით დააბრუნებინა - ეგ გახდა თქვენი თავისუფლების პრობლემა," - აღნიშნავს კალაძე.

2 მარტს ტელეკომპანია რუსთავი 2 საქართველოს უზენაესმა სასამართლომ მის ძველ მფლობელს, ქიბარ ხალვაშსა და მის კომპანიას მიაკუთვნა. არხის იურისტებმა გადაწყვეტილების გაცნობის შემდეგ სტრასბურგის ადამიანის უფლებათა სასამართლოს მიმართეს. სტრასბურგის სასამართლომ საქართველოს უზენაესი სასამართლოს გადაწყვეტილების აღსრულება 8 მარტამდე შეაჩერა.