მამა ათინოგენის განცხადებით, ის, რაც 5-6 ივლისს ძალადობრივ კონტრაქციებზე მოხდა, მართლმადიდებლობის სახე არ არის და არ შეიძლება გამართლება. ამის შესახებ მან TV პირველის ეთერში ისაუბრა.

"ჩვენი სწავლება მომდინარეობს სახარებიდან, ქრისტეს განცხადებიდან და იქ თქვენ ვერსად ვერ მომიყვანთ და ვერ მაჩვენებთ ისეთ ადგილს, რითაც ამითი შეიძლებოდეს იმ ყველაფრის გამართლება, რაც ამ ადამიანებმა იქ ჩაიდინეს. ეს არ არის მართლმადიდებლობის სახე. თქვენ კარგად იცით, რომ ჩვენ, როგორც ეკლესია ვემიჯნებით ცოდვას, არ ვიღებთ ამას ეკლესიის წიაღში და ვამბობთ, რომ არ არის ეს ღვთისთვის სათნო, მაგრამ ამავე დროს, განსხვავებული ორიენტაციის, აზრისა და ამ ცხოვრების მიმდევარი ადამიანები ჩვენ ვდევნოთ, ეს კატეგორიულად მიუღებელია, მართლმადიდებლობა ასეთ რამეს არ ასწავლის, არსაც არ შეიძლება ეს რომ მოხდეს", — განაცხადა მან.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.