საქართველოს ეტლით მოფარიკავე გოგონათა ნაკრებმა პოლონეთის დედაქალაქ ვარშავაში მიმდინარე მსოფლიო ჩემპიონატზე ხმლით ფარიკაობაში პირველი ადგილი მოიპოვა. ეს სასიხარულო ინფორმაცია საზოგადოებას საქართველოს ფარიკაობის ფედერაციამ გაუზიარა.

მსოფლიო ჩემპიონები ირმა ხეცურიანი, ნინა თიბილაშვილი და გვანცა ზადიშვილი გახდნენ. მათ 6 ივლისს გამართულ ფინალში უკრაინის ნაკრები დაამარცხეს.

ფოტო: საქართველოს ფარიკაობის ფედერაცია

"ვულოცავ ჩვენს პატარა საქართველოს, რომ მსოფლიოში დიდად მოიხსენიებენ, ჩვენ ეს შევძელით, ჩვენ მსოფლიოში პირველები ვართ, მსოფლიო ჩემპიონები... გილოცავთ, რომ მსოფლიომ ზუსტად იცის ჩვენი Georgia, რომელიც დამოუკიდებელი ქვეყანაა და მისი დამარცხება რთულია", — წერს ნინა თიბილაშვილი საკუთარ ფეისბუქ გვერდზე.

აღსანიშნავია დიანა ჯიშიაშვილის წარმატებაც, რომელმაც რაპირით ფარიკაობაში მეორე ადგილი და ვერცხლის მედალი მოიპოვა.