მოძრაობა სირცხვილია აცხადებს, რომ დღეს კონტრაქციის მონაწილეების მხრიდან განხორციელებულ ძალადობაზე პასუხისმგებლობა პრემიერმინისტრს ეკისრება, რომელმაც დღევანდელი განცხადებით მწვანე შუქი აუნთო მოძალადე ჯგუფებს.

"მეგობრებო, მადლობა მხარდაჭერისთვის! სირცხვილიას არცერთი აქტივისტი არ დაშავებულა და ყველანი უსაფრთხოდ ვართ. ამ აგრესიაზე პასუხისმგებლობა ეკისრება პრემიერს, რომელმაც დღევანდელი განცხადებით მწვანე შუქი აუნთო მოძალადე ჯგუფებს. შინაგან საქმეთა სამინისტროს მოვუწოდებთ დაიცვას კანონი და დაუყოვნებლივ აღკვეთოს ძალადობა", — აცხადებს სირცხვილია.

სულ ცოტა ხნის წინ ჰომოფობიური და ძალადობრივი ჯგუფები სირცხვილიას ოფისის შენობაში შევარდნენ. როგორც კადრებში ჩანს ისინი კიბეებზე არბოდნენ, რა დროსაც TV პირველის ოპერატორს თავს დაესხნენ და პირდაპირი ეთერი გაითიშა. ჟურნალისტის ინფორმაციით, ოპერატორს ფიზიკურად გაუსწორდნენ, ჩამსხვრეულია შუშები და დაზიანებულია შესასვლელი.

TV პირველის ინფორმაციით, დალეწილია კამერა, ჟურნალისტს კი მობილური ტელეფონი წაართვეს და დაუმტვრიეს. მათივე განცხადებით, პოლიცია ძალადობაზე არ რეაგირებს.

ჰომოფობიური და ძალადობრივი კონტრაქციის მონაწილეებმა რუსთაველზე ოპოზიციის მხარდამჭერების კარვები აყარეს. დაზიანებული კარვები იქვე, პარლამენტის წინ ყრია.

შსს მოუწოდებს თბილისი პრაიდს, უარი თქვან საჯარო სივრცეში მარშის გამართვაზე. ასევე პრემიერი ღარიბაშვილი აცხადებს, რომ მისი აზრით, ღირსების მარში არ უნდა გაიმართოს.

"საქართველოს პრემიერმინისტრმა, ირაკლი ღარიბაშვილმა "კოჭების გაგორების სერია" გააგრძელა", — ასე აფასებს მარშის ერთ-ერთი ორგანიზატორი, თამაზ სოზაშვილი ღარიბაშვილის დღევანდელ განცხადებებს ღირსების მარშთან დაკავშირებით.

თბილისი პრაიდის კვირეული დღეს, 5 ივლისს ღირსების მარშით დასრულდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

დღეს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან არიან შეკრებილები და იმუქრებიან, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიჰყავთ ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

ამავე თემაზე: