საქართველოს პრეზიდენტი, სალომე ზურაბიშვილი პარიზში, სამუშაო ვიზიტის ფარგლებში, საფრანგეთის პრეზიდენტ ემანუელ მაკრონს შეხვდა. ზურაბიშვილის ადმინისტრაციის ცნობით, ელისეს სასახლეში, საქართველოსა და საფრანგეთის პრეზიდენტებმა ქვეყნებს შორის ორმხრივი პოლიტიკური და ეკონომიკური ურთიერთობების გააქტიურებისა და განვითარების საკითხები, რეგიონში მიმდინარე პროცესები, ევროკავშირის როლი რეგიონში და შავი ზღვის უსაფრთხოების საკითხები განიხილეს.

მათივე განცხადებით, ზურაბიშვილმა და მაკრონა, ასევე, ისაუბრეს "დიმიტრი ამილახვარის სახელობის ფრანგულ-ქართული დიალოგის" აღდგენის საკითხზე, რომელსაც ხელი ორმა პრეზიდენტმა 2019 წლის თებერვალში პარიზში მოაწერა. პრეზიდენტის პრესსამსახურის ინფორმაციით, რაც თანამშრომლობის ამ ფორმატში საქართველოსა და საფრანგეთს შორის ორმხრივი ურთიერთობების მთავარ ასპექტებს მოიცავს და ამ თანამშრომლობის ხარისხსა და ინტენსივობას ასახავს.

"საქართველოს პრეზიდენტმა ემანუელ მაკრონს საქართველოს ოკუპირებულ ტერიტორიებზე არსებული მძიმე ჰუმანიტარული ვითარების, საოკუპაციო რეჟიმის მიერ ადამიანის უფლებების დარღვევებისა და ადამიანთა გატაცებების შესახებ ინფორმაცია მიაწოდა", — აცხადებს პრეზიდენტის ადმინისტრაცია.

მათივე ცნობით, მხარეებმა, ასევე, მიმდინარე წელს, საფრანგეთში ქართული ემიგრაციის 100 წლისთავის აღნიშვნის საკითხი განიხილეს.